محبوبہ مُفتی کٔرعمرعبداللہ ہَس مقٲمی اخبارَن سرکٲرۍ اِشتِہار بحال کرنٕچ اپیل۔

پی ڈی پی صدر تہٕ سٲبقہٕ وزیر اعلیٰ محبوبہ مُفتیَن کٔر وزیر اعلیٰ عمر عبداللہ ہَس مقٲمی اخبارَن منٛز سرکٲرۍ اشتہار بحال کرنٕچ اپیل ۔ تٔمۍ ووٚن: ‘سرکٲرۍ اِشتِہارن ہٕنٛدِ معطلی سۭتۍ چھُ مقٲمی میڈیا ماحولیٲتی نظامَس منٛز بحران گوٚمُت۔’ سٲبقہٕ وزیر اعلیٰ یَن ووٚن برٛسوارِ دۄہ ‘ایکس’ پٮ۪ٹھ أکِس پوسٹَس منٛز: ‘لۄکٹٮ۪ن تہٕ سرکردہ دۄشوٕنی اشاعتن خٲطرٕ ضروٗری سرکٲرۍ اشتہارات معطل کرنہٕ سۭتۍ چھِ پوٗرٕ وادی منٛز پرنٹ صحافت پوٗرٕ پٲٹھۍ تباہ گٔمٕژ۔’ تٔمۍ ووٚن مزیٖد: ‘امہِ سۭتۍ چھُ مقٲمی میڈیا ماحولیٲتی نظامَس منٛز بحران مزید گوٚڑمُت تہٕ ہتہٕ بٔدۍ خاندان مُتٲثِر گٔمٕتۍ یِم پننہِ روزی روٹی خٲطرٕ اتھ پٮ۪ٹھ انحصار کران چھِ۔