کشمیر کٮ۪ن کینٛہہ پہٲڑی علاقن منٛز تازٕ شیٖن، مٲدٲنی علاقن منٛز واریاہ زیادٕ روٗد۔

وادی کشمیرَس منٛز جٲری خراب موسمی حالاتَن منٛز، ییٚتہِ مٲدٲنی علاقَن منٛز وقفہٕ وقفہٕ سۭتۍ روٗد چھُ پٮ۪وان، کینٛہَن پہٲڑی علاقَن منٛز چھُ تازٕ شیٖن پیومُت۔ رپورٹَو مُطٲبِق پیوٚو پیر کی گلیَس منٛز 2 پٮ۪ٹھ 4 انچ، رازدان ٹاپس پٮ۪ٹھ 3 انچ، تہٕ سنتھن ٹاپس پٮ۪ٹھ تقریباً 2 انچ، ییٚلہِ زَن کینٛہہ باقی پہٲڑی علاقَن منٛز تہِ ہلکہٕ شیٖن پیوٚو۔ موسمیات محکمَن دِژ اطلاع زِ پٔتِمٮ۪ن 24 گھنٹَن منٛز آو سری نگرَس منٛز 19.3 ملی میٹر، قازیگنڈَس منٛز 15.4 ملی میٹر، پہلگامَس منٛز 13.2 ملی میٹر، کپواڑہَس منٛز 11.2 ملی میٹر، گلمرگَس منٛز 24.6 ملی میٹر تہٕ بارہمولہَس منٛز 22 ملی میٹر روٗد رِکارڈ کرنہٕ۔ مُتعلقہٕ محکمہٕ کِس ترجُمانَن دِیُت اِشارٕ زِ 31 مئی چھُ وادی منٛز گرج تہٕ آسمانی بجلی سۭتۍ ہلکہٕ پٮ۪ٹھٕ درمیٲنی روٗد پٮ۪نُک تہِ اِمکان، تہٕ اتھ وقتس دوران ہٮ۪کہِ کینٛہَن جایَن تیز ہوہَس سۭتۍ سٮ۪ٹھا روٗد پٮ۪تھ۔ تٔمۍ کوٚر ذِکِر زِ 1 تہٕ 2 جوٗن چھُ کینٛہَن مُقامَن پٮ۪ٹھ گرج تہٕ بجلی سۭتۍ ہلکہٕ روٗد پیٚنُک اِمکان۔ اَمِہ علاوٕ ووٚن تٔمۍ زِ 4 پٮ۪ٹھ 6 جون تام چھُ عام طور موسم خۄشٕک روزنُک امکان۔