کٲشِرٮ۪و پنڈتو ورٲے چھُ سیٲسی عمل نامُکمل: محبوبہ مفتی

پی ڈی پی صدر تہٕ سٲبقہٕ وزیر اعلیٰ محبوبہَن کوٚر کٲشِرۍ پنڈتَن ہٕنٛز واپسی ہٕنٛز اہمیتُک اعادہ تہٕ ووٚنُن زِ تِمَو ورٲے ہٮ۪کہِ نہٕ کانٛہہ تہِ سیٲسی عمل پوٗرٕ کٔرِتھ۔ تٔمۍ ووٚن زِ یہِ چھُ وق زِ کٲشِرۍ پنڈتَن ہٕنٛز جلاوطنی ہُنٛد الزام کٲشِرٮ۪ن پٮ۪ٹھ لگاونہٕ یِنہٕ وول الزام ہٹاوُن۔ تٔمۍ دِیُت اَتھ کَتھِ پٮ۪ٹھ زور زِ نامزدگی بدلہٕ گژھن تِمَن کٲشِرۍ پنڈتَن سیٲسی طور بااختیار بناونہٕ خٲطرٕ تحفظات دِنہٕ یِنۍ۔ سٲبقہٕ ؤزیٖرِ اعلیٰ کٔر یہِ بیان ژٔنٛدٕروارِ دۄہ لیفٹیننٹ گورنر منوج سنہاہَس سۭتہِ مُلاقات کرنہٕ پتہٕ أکِس پریس کانفرنسَس دوران ۔ تٔمۍ ووٚن: ‘مےٚ سمکھیوٚو آز لیفٹیننٹ گورنر منوج سنہاہَس تہٕ دِتُن تٔمِس اکھ چِٹھۍ پیش، ییٚمیُک اکھ نقل عمر عبداللہ تہٕ بیٛاکھ وزیر داخلہ امیت شاہس تہِ سوزنہٕ آمُت یَتھ منٛز ترٛٮ۪ن اَہَم مسلن ہُنٛد ذِکِر اوس۔ تٔمۍ ووٚن: ‘أسۍ چھِ مانان زِ کٲشِرۍ پنڈتو ورٲے ہیٚکہِ نہٕ ییٚتہِ کانٛہہ تہِ سیٲسی عمل پوٗرٕ کٔرِتھ۔’ تٔمۍ ووٚن بیٚیہِ زِ کٲشِرۍ پنڈتن ہٕنٛز واپسی یقینی بناوٕنۍ چھِ ضروٗری۔