شامَس تام ہلکہٕ روٗد تہٕ شیٖن پیٚنُک امکان،جموں و کشمیرَس منٛز 11 پٮ۪ٹھٕ 19 اکتوبرَس تام خۄشٕک موسمُک امکان

محکمہٕ موسمیاتن کٔر جُمعہ دۄہ شامَس جموں و کشمیر کٮ۪ن تھزرٮ۪ن علاقن منٛز ہلکہٕ روٗد تہٕ ہلکہٕ شیٖن پیٚنٕچ پیشن گوئی، ییٚلہِ زن یِنہٕ والٮ۪ن دۄہَن منٛز عام طور خۄشٕک حالات آسنُک امکان۔محکمہ موسمیات (ایم ای ٹی) ہٕکۍ ڈائریکٹر ڈاکٹر مختار احمدَن دِژ خبر رساں ایجنسی جے کے این ایسَس اطلاع زِ از ژیرِ دُپہرَس یا شامَس تام ہیکہِ کینٛہَن علاقَن منٛز ہلکہٕ روٗد یا شیٖن پیٚتھ۔تٔمۍ ووٚن زِ 11 اکتوبر پٮ۪ٹھٕ 19 اکتوبرَس تام روزِ سٲرِسٕے مركزی زیر انتظام علاقَس منٛز موسم زیادٕ تر خۄشٕک، یَتھ وقتَس دوران نہٕ کانٛہہ خاص موسمی واقعہٕ گژھنُک امکان۔پننِس ایڈوائزری منٛز کٔر ایم ای ٹی سینٹر سرینگرَن زٔمیٖن دارن تمام زرعی سرگرمیہِ جٲری تھاونٕچ حوصلہٕ اَفزٲیی، تِکیازِ یِنہٕ والٮ۪ن دۄہَن منٛز چھِ موسمی حالات کھیت کامہِ خٲطرٕ سازگار آسنُک امکان۔