وٮ۪جبہارہ چوکَس منٛز ڈمپر تہٕ موٹر سائیکلَس درمیان ٹکراو کِس واقعَس منٛز شہری زخمی۔

جنوٗبی ضِلعہٕ اننت ناگ کِس باجبہارہ علاقس منٛز گوٚو اکھ موٹر سائیکل چلاون وول ڈمپرَس سۭتۍ ٹکراونہٕ سۭتۍ زخمی۔ خبرو مُطٲبِق گوٚو اننت ناگ ضِلعہٕ کِس باجبہارا علاقُک اکھ 33 وۅہر شخٕص وٮ۪جبہارا چوکَس منٛز أمۍ سٕنٛز موٹر سائیکل ڈمپر سۭتۍ ٹاس لگنہٕ کِنۍ شٔدیٖد زخمی۔ چشمہٕ دید گواہو ووٚن زِ یہِ حٲدِثہٕ گوٚو تَمہِ وِزِ ییٚلہِ تیز رفتار ڈمپر موٹر سائیکلَس سۭتۍ ٹاس آو ییٚمہِ کِس نٔتیٖجس منٛز سوار زخمی گوٚو۔ تِمَو ووٚن زِ مقٲمی لوٗکَو کٔر زخمی شخٕص فوری طور ہسپتال منتقٕل، ییٚتہِ ڈاکٹرَو سُہ علاج باپتھ سرینگر ریفر کوٚر۔ أکۍ سینئر پولیس افسرَن کٔر تصدیٖق زِ سڑک حٲدِثَس منٛز چھُ اکھ شہری زخمی گوٚمُت۔ تٔمۍ ووٚن زِ شہری آو علاج باپتھ ہسپتال نِنہٕ۔ تٔمۍ ووٚن زِ اَتھ معاملَس منٛز چھُ مقدمہٕ درٕج کرنہٕ آمُت تہٕ تفتیش چھِ شُروٗع گٔمٕژ۔