حکوٗمت چھےٚ درخواست فیس معاف کرنُک وعدٕ پوٗرٕ کرنس منٛز ناکام: سجاد لون

جموں و کشمیر پیپلز کانفرنسُک صدر تہٕ قانون ساز اسمبلی ہٕنٛدِ رُکُن سجاد لونَن لگوو حکوٗمتَس پٮ۪ٹھ الزام زِ سۅ چھےٚ مُختٔلِف بھرتی ایجنسیَو ذٔریعہٕ جمع کرنہٕ آمٕتۍ درخاس برایہِ فیس معاف کرنُک پنُن اِنتخٲبی وعدٕ پوٗرٕ کرنس منٛز ناکام ٲسِتھ جموں و کشمیرکٮ۪ن نوجوانَن گمراہ کران۔

بۄموارِ دۄہ ‘X’ پٮ۪ٹھ أکِس پوسٹَس منٛز ووٚن تٔمۍ زِ: ‘نیشنل کانفرنسَن اوس پننِس انتخابی منشورَس منٛز جموں و کشمیر سروسز سلیکشن ریکروٹمنٹ بورڈ (جے کے ایس ایس آر بی)، جموں و کشمیر پبلک سروس کمیشن (جے کے پی ایس سی) تہٕ باقٕے ریاستی اِدارَن ہٕنٛدِ طرفہٕ اوس وصول کرنہٕ یِنہٕ وول درخاس براے فیس ختم کرنُک وعدٕ کوٚرمُت۔

تٔمۍ ووٚن پوسٹَس منٛز بیٚیہ: ‘ییٚلہِ مےٚ یہِ زاننہٕ خٲطرٕ اکھ سوال پرُژھ زِ کیا یہِ اِنتِخابی وعدٕ چھا پوٗرٕ گوٚمُت، وزیر اعلیٰ سُنٛد جواب اوس زِ پٔتمہِ اکتوبر پٮ۪ٹھٕ چھِ 31 کرور رۄپیہِ درخاس فیس چہِ شکلہِ منٛز جمع کرنہٕ آمٕتۍ’۔