4 تہٕ 5 نومبر کٔشیٖرِ منٛز شین تہٕ روٗد پیٚنُک اِمکان ۔

محکمہ موسمیات چہِ پیش نگویی مُطٲبِق چھُ 4 تہٕ 5 نومبر کٔشیٖرِ منٛز ہلکہٕ شیٖن تہٕ روٗد پیٚنُک امکان ییٚمہ کِنۍ وادی ہٕنٛدِس درجہٕ حرارتس منٛز نمایاں کٔمی ہٮ۪کہِ یِتھ۔ محکمٕچ ایڈوائزری مُطٲبِق ہیکہِ اتھ وقتس دوران 4 نومبر چہِ رٲژ کینژھن علاقن منز وُزملہٕ ،گگراے تہِ تیز واو تہِ ٲسِتھ۔مُتعلقہٕ محکمٕکۍ ترجمانَن ووٚن زِ وادی ہُند موسم روزِ عام طور 1 نومبر پیٹھٕ 3 نومبرس تام خۄشٕک۔تِمَو ووٚن زِ 4 تہٕ 5 نومبر ہٮیٚکہِ وادی کٮ۪ن بٔنمٮ۪ن علاقَن منٛز ہلکہٕ روٗد پیٚتھ، ییٚلہِ زن پہٲڑی علاقَن منٛز ہلکہٕ شیٖن پیٚنُک امکان چُھ۔ تِمَو ووٚن زِ جۅم علاقَس منٛز چھُ 4 نومبر شامہٕ پٮ۪ٹھٕ 5 نومبر دُپہرَس تام روٗد پیٚنُک امکان۔ ترجمانَن ووٚن یہِ تہِ زِ امہِ پتہٕ چھُ 6 نومبر پٮ۪ٹھٕ 13 نومبرَس تام موسم عام طور بیٚیہِ خۄشٕک روزنُک امکان۔