سوپورَس منٛز زٕ ملی ٹنٹ گِرِفتار، ہتھیار تہٕ دھماکہٕ خیز مواد برآمد: پولیس

جموں و کشمیر پولیسَن چھےٚ فوج تہٕ سی آر پی ایفَس سۭتۍ مُشترکہٕ کاروٲیی منٛز شُمٲلی کشمیر کِس سوپور قصبس منٛز زٕ ہائبرڈ ملی ٹنٹ گِرِفتار کٔرمٕتۍ۔ حکامَو مُطٲبِق اوس گِرِفتار کرنہٕ آمتٮ۪ن نفرَن نِش ہتھیار، دھماکہٕ خیز مواد تہٕ قابل اعتراض مواد برآمد کرنہٕ آمُت، یُس ملی ٹنٹ کارروائیَن منٛز مُلوث آسنُک اِشارٕ چھُ کران۔
پُلیٖسٕکۍ ترجمانَن ووٚن زِ یہِ کاروٲیی آیہِ از برٛٮ۪سوارِ دۄہ صِدیق کالونی مومن آبادَس نزدیٖک کرنہٕ، ییٚتہِ پولیسٕچ اَکہِ مُشترکہٕ ٹیٖمہِ تہٕ 22 راشٹریہ رائفلز تہٕ 179 بَٹالِین سی آر پی ایفَن ٲس اتہِ مخصوٗص خُفیہٕ زانٛکٲری ہِنٛدِس بُنیادَس پٮ۪ٹھ اکھ چوکی قٲیِم کٔرمٕژ۔ معلوٗمات ٲسۍ زِ زٕ شکاوَر نفر ٲسۍ علاقہٕ مٔنٛزۍ نیران۔
ترجمانَس مُطٲبِق، ‘چیکِنٛگ دوران کٔر سوپور فروٹ مارکیٹ پٮ۪ٹھٕ آہت بابا کراسنگَس کُن یِنہٕ وٲلۍ دۄیو نفرَو فوج وُچھِتھ ژلنٕچ کوٗشش تہٕ افسَرن ہٕنٛدِ پیشہٕ ورانہٕ مہارژ کِنۍ آے دۄشوے موقعس پٮ۪ٹھے رٔٹنہٕ۔’