بڈگام تہٕ ناگروٹہ نتٲیج چھِ نیشنل کانفرنسٕکۍ ناکام وعدٕ تہٕ خفیہ گٹھ جوڑ بے نقاب کران : عبدالغنی واکیل

بڈگام تہٕ ناگروٹہ ضمنی چُناون ہِنٛدِس نٔتیٖجس پٮ۪ٹھ ردِعمل دِوان ووٚن سٲبقہٕ ؤزیٖر تہٕ جموں و کشمیر پیپلز کانفرنسٕکۍ سینئر نٲیِب صدٕر عبدالغنی وکیلَن زِ یہِ فتح ہٮ۪کو نہٕ صِرِف پی ڈی پی خٲطرٕ فتح مٲنِتھ ۔ تٔمۍ ووٚن:”حقیقت چھےٚ یہِ زِ آغا روح اللہ تہٕ مولوی انصاری ہٮ۪تھ باقٕے قوتَو کٔر براہ راست یا بالواسطہٕ پی ڈی پی امیدوارَس حمایت۔ اَمہِ علاوٕ چھےٚ یہِ حقیقت زِ پی ڈی پی امیدوار اوس أکِس معزز روحٲنی پیشوا سُنٛد نیٚچُو”۔

ناگروٹہ ضمنی انتخابَس مُتعلِق ووٚن وکیلَن زِ نٔتیجہِ چھِ این سی تہٕ بی جے پیَس درمیان ‘فکسڈ میچ’ واضح پٲٹھۍ ظٲہِر کران۔ تٔمۍ ووٚن:”اگر این سی پٔزۍ پٲٹھۍ بی جے پی ہارناوُن یژھان چھُ، تِمو آسہے نہٕ یُتھ کمزور امیدوار کھڑا کوٚرمُت تیٚلہِ۔ تِمَن پَزِ یا تہِ اکھ مضبوٗط پارٹی رہنُما کھڑا کرُن یا ہرش دیو سنگھس حمایت کرٕنۍ، یُتھ مُقابلہٕ گژھہِ سٔنٛجیٖدٕ ۔ اکھ کمزور وۄمیدوار کھڑا کرُن چھُ یہِ ثٲبت کران زِ این سی پارٹی ہُنٛد اِرادٕ اوس بی جے پی خٲطرٕ وتھ صاف کرٕنۍ”۔