عوامی اتحاد پارٹی (اے آے پی)ہُنٛد نوگام دورٕ،متٲثرینن ہٕنٛدٮ۪ن عیالَن سۭتۍ یکجہتی، ہمدردی تہٕ حمایتُک اِظہار۔

عوامی اتحاد پارٹی (اے آے پی) ہٕنٛزِ أکۍ وفد کوٚر از نوگام دورٕ،متٲثرینن ہٕنٛدٮ۪ن عیالَن سۭتۍ یکجہتی، ہمدردی تہٕ حمایتُک اِظہار۔وفدِ ہٕنٛز قیادت کٔر اے آے پی ہٕکۍ چیف ترجُمان اِنام النبی تہٕ اَتھ منٛز ٲسۍ سینئر رہنُما پرویز احمد بھٹ، مہراج الدین گنائی، مشتاق احمد تہٕ ایم پی بارامولا انجینیر رشید سُنٛد نیچو ابرار رشید تہِ شٲمِل۔

انعام النبین ووٚن زِ قۭمتی جانَن ہٕنٛدۍ ضایع گژُھن چُھ "خاندان تباہ کران تہٕ پوٗرٕ پٲٹھۍ معاشرَس ہِلٲوان”، بیٚیہِ ووٚنُن زِ سوگوارَن تسلی دِنہٕ خٲطرٕ چھُنہٕ کانٛہہ تہِ لفٕظ کٲفی۔ تٔمۍ دیُت خاندانن یٔقیٖن زِ اے آے پی چھُ تِمَن سۭتۍ پوٗرٕ پٲٹھۍ کھڑا تہٕ روزِ پرٮ۪تھ پلیٹ فارمَس پٮ۪ٹھ تِہٕنٛدۍ خدشات اجاگر کران۔

"أمۍ سانحن چھُ اسہِ سارِنٕے سٮ۪ٹھاہ تکلیف واتنوومُت۔ أسۍ چھِ پرٮ۪تھ مُتٲثِر خاندانُک غم بٲگران تہٕ طاقت، شفا تہٕ امن خٲطرٕ دُعا کران ۔”