لال قِلعہٕ گاڑِ دھماکَس منٛز ہلاک گژھن وٲلِس کنگنہٕ کِس مزوٗر سٕنٛز لاش آیہِ گرٕ واتناونہٕ۔

27 وُہُر بلال احمد سانگو سٕنٛز لاش، یُس دِلہِ ہٕنٛدِس لال قعلَس نزدیٖک حالٕے گاڑِ دھماکَس منٛز ہلاک سپُدمُت اوس، آیہِ بودوارِ دۄہ أمۍ سٕنٛدِس آبٲیی گامَس بابا نگری وانٛگت کنگن واتناونہٕ۔
اِطلاعات مُطٲبِق ییٚلہِ بلال احمد سٕنٛز لاش بۄدوارِ دۄہ أمۍ سٕنٛدِس آبٲیی گامَس منٛز وٲژ، پرٛٮ۪تھ جایہِ اوس سوگُک ماحول قٲیِم، تہٕ أمۍ سٕنٛدۍ دوس تہٕ رِشتہٕ دار خاص پٲٹھۍ زنانہٕ آیہِ بےٚ قوبوٗ وٕچھنہٕ۔
وننہٕ چھُ یِوان زِ بلال احمد سٕنٛز لاش وٲتِتھ گٔے گامَس منٛز بٔڑِس تعدادَس منٛز لوٗکھ جمع تہٕ اَتہِ آو جذبٲتی منظر وُچھنہٕ۔
مُقٲمی ذرایعو مُطٲبِق اوس بلال احمد واریاہَو ؤرۍ یَو پٮ۪ٹھ دِلہِ منٛز مزوٗرۍ کران تہٕ اوس پنُن عیال پالان ۔
اتھ موقعَس پٮ۪ٹھ ووٚن کنگن قونون ساز اسمبلی ہٕنٛدۍ رُکُن میاں ماہر علی یَن میڈیاہَس زِ: ‘مےٚ چھُ گۄڈَے تِمَن مدد کوٚرمُت تہٕ برٛونٛہہ کُن تہِ روزِ یہِ کران’۔
تٔمۍ ووٚن زِ حکوٗمت کَرِ مُتٲثِر خاندانَس تمام مُمکِن مدد۔