عمر عبداللہ ہن سُنٛد مرکزس چیلینج: منتخب حکومتس دِیِنۍ اختیارات تہٕ اگر یہ ناکام گٔیہِ تیٚلہِ نِیِنۍ اختیارات واپس۔

نیشنل کانفرنسٕچ ورکنگ کمیٹی ہٕنٛدِس دۄن دۄہَن ہٕنٛدِس اجلاس کِس اختتامَس پیٹھ ترٛوو وزیر اعلیٰ عمر عبداللہَن أکِس اہم پریس کانفرنسہِ خٕطاب کران جموں و کشمیرٕچ موجودٕ سیاسی، اِنتِظٲمی تہٕ سیکورٹی صورتحالَس پٮ۪ٹھ تفصیٖلی گاش۔ عمر عبداللہ ہَن ووٚن زِ ییٚلہِ نیشنل کانفرنسٕچ ژارنہٕ آمٕژ حکومت ریاستٕچ قیادت ٲس کران، تتہِ گوٚو نہٕ پلوٲمِس ہیوٗ حملہٕ تہٕ نہ گوٚو دِلہِ طرزُک کانٛہہ واقعہٕ۔ تٔمۍ ووٚن زِ یہِ چھُ مرکزٕچ ذمہٕ وٲری زِ سُہ دِیِنۍ آئینی اختیار یعنی امن و امانُک کنٹرول منتخب حکومتس واپس ۔ تٔمۍ کوٚر اکھ چلینج جٲری زِ اگر حکوٗمت یہِ اختیار استعمال کرنس منٛز ناکام روزِ، تیٚلہِ ہیٚکہِ مرکز یہِ واپس نِتھ، مگر منتخب نمایندٕ جوابدہ بناونہٕ برٛونٛہہ چھُ تِمَن اختیار دِیُن ضروٗری۔
عمر عبداللہَن کٔر بجلی ہٕنٛدِس صورتحالَس مُتعلِق تہِ کتھ تہٕ وضاحت کٔرِتھ زِ ریاستَس منٛز چھِ میٹرنگ وُنہِ تہِ پنژاہ فیصد کھۄتہٕ کم، ییٚمہِ کِنۍ زِیٛادٕ تَر گَرٕ چھِنہٕ 200 مُفت یونٹ فراہم کَرن واجنہِ سکیمہِ نِش فٲیدٕ تُلِتھ ہیٚکان۔