سرینگر جے وی سی ہسپتالَس منٛز نار، 4 کمرَن نۄقصان

بَٹہٕ وارِ دۄہ صُبحٲے لوٚگ سرینگر کِس بیمینا علاقَس منٛز واقعہٕ جے وی سی ہسپتالٕچ آؤٹ پیشنٹ ڈپارٹمنٹ (او پی ڈی) عمارتہِ منٛز نار، ییٚمہِ کِس نٔتیٖجس منٛز کم از کم ژورن کمرَن شٔدیٖد نۄقصان گوٚو۔

ذٔرایعَو وون زِ بَٹہٕ وارِ دۄہ صُبحٲے 6 بجہِ لوٚگ جے وی سی ہسپتال، بیمینا چہِ او پی ڈی عمارتہِ ہٕنٛدِس دۅیمِس پوہرس نار ۔

فائر اینڈ ایمرجنسی ڈیپارٹمنٹٕکۍ أکۍ اہلکارَن ووٚن زِ واقعہٕچ اطلاع مِلنہٕ پتہٕ آیہِ نارٕکۍ ٹینڈر فوری طور واقعہٕ جایہِ پٮ۪ٹھ سوزنہٕ، تہٕ تِمو اوٚن نار قوبوَٗس منٛز۔

تٔمۍ ووٚن زِ اَتھ واقعَس منٛز چُھ کم از کم ژورن فیکلٹی کمرَن نۄقصان ووتمُت، مگر کانٛہہ تہِ جٲنی نۄقصان چھُنہٕ۔

حکامَو ووٚن زِ نارٕ لگنٕہ کٮ۪ن وجوہاتَن ہُنٛد چھُ تفتیش جٲرِی تہٕ نۄقصانُک تہِ چھُ جٲیزٕ یِوان کرنہٕ۔