اننت ناگَس منٛز ملی ٹنٹ معاون گِرِفتار، ہینڈ گرنیڈ برآمد: پولیس

اننت ناگ پولیسَن کٔر سیکورٹی فورسَن سۭتۍ مُشترکہٕ کارروٲیِی منٛز جیش محمدَس سۭتۍ وابستہٕ اکھ ملی ٹنٹ معاون گِرِفتار تہٕ أمۍ سٕنٛدِس قبضَس تل اکھ ہینڈ گرنیڈ برآمد کٔرِتھ کٔرٕکھ اہم کامیٲبی حٲصِل۔

پُلسہٕ ذٔرایعَو وون زِ ننیر مدورا علاقَس منٛز أکِس شکاوَر شخٕص سٕنٛزِ نقل و حرکتَس مُتعلِق تصدیٖق شُدٕ زانکٲری ہِنٛدِس بُنیادَس پٮ۪ٹھ کٔر اننت ناگ پولیسَن 42 راشٹریہ رائفلز تہٕ 180 بٹالِین سی آر پی ایفَس سۭتۍ مِلِتھ مُشترکہٕ تلاشٕچ کاروٲیی شُروٗع۔ کاروٲیی دوران آو اکھ ملی ٹنٹ معاون حِراستَس منٛز نِنہٕ۔

گِرِفتار کرنہٕ آمٕتِس شکاوَر شخٕصہٕ سٕنٛز شناخت چھےٚ لاڈو کھیرو کِس روزَن وٲلِس نذیر احمد تیلی سُنٛد نیٚچُوِ مُسیب نذیر ناوٕ سۭتۍ کرنہٕ آمٕژ، یُس جیش محمدُک سرگرم معٲونہٕ پٲٹھۍ کٲم اوس کران۔ پُلسہٕ مُطٲبِق اوس واقعہٕ جایہِ پٮ۪ٹھٕ أمۍ سٕنٛدِ قبضہٕ منٛزٕ اکھ ہینڈ گرنیڈ تہِ برآمد کرنہٕ آمُت ۔

پولیسَن ووٚن زِ 257/2025 نمبرَس تحت چھِ مُتعلقہٕ قونوٗنی دفعَن تحت ایف آئی آر درٕج کرنہٕ آمُت، تہٕ أمۍ سٕنٛدِ نیٹ ورک، رٲبطہٕ تہٕ سرگرمیَن ہُنٛد سراغ لگاونہٕ خٲطرٕ چُھ مٔزیٖد تفتیش شُروٗع کرنہٕ آمُت۔