کٔشیٖرِ منٛز چُھ سخت سردی جٲری، شوپیاں چھُ سارِوٕے کھۄتہٕ سرد علاقہٕ

پہٲڑی علاقن تہٕ وادی کشمیر کین سیاحتی مقامن منٛز تازٕ شیٖن پیٚنہٕ دوران چھُ سخت وندٕ لگاتار جٲری۔
کشمیر موسمہٕ مُطٲبِق آو رٮ۪تہٕ کالہِ ہٕنٛز رازدٲنی سرینگرَس منٛز رٲژ ہُنٛد درجہٕ حرارت منفی 3.2 ڈگری سیلسیس ریکارڈ کرنہٕ، ییٚلہِ زَن راتھ رٲژ درجہٕ حرارت منفی 1.5 ڈگری سیلسیس ریکارڈ کرنہٕ آمُت۔
وادی ہٕنٛدٮ۪ن مشہوٗر سیاحتی مُقامَن، گُلمرگ تہٕ پہلگامَس منٛز آو کم از کم درجہٕ حرارت بِلترتیب منفی 4.2 ڈگری سیلسیس تہٕ منفی 2.6 ڈگری سیلسیس ریکارڈ کرنہٕ۔
سرحدی ضِلعہٕ کُپواڑہَس منٛز آو کم از کم درجہٕ حرارت منفی 2.2 ڈگری سیلسیس درٕج کرنہٕ، ییٚلہِ زَن کٔشیٖرِ ہٕنٛدِ گیٹ وے ناوٕ سۭتۍ مشہوٗر قاضی گُنٛڈ شہرَس منٛز آو رٲژ ہُنٛد درجہٕ حرارت منفی 3.4 ڈگری سیلسیس ریکارڈ کرنہٕ۔
شوپیان، جنوبی کشمیرُک اکھ ضِلعہٕ روٗد وادی ہُنٛد سارِوٕے کھۄتہٕ سرد علاقہٕ، ییٚتہِ کم از کم درجہٕ حرارت منفی 5.6 ڈگری سیلسیس ریکارڈ آو کرنہٕ، ییٚلہِ زن پلوامہ ضِلعَس منٛز رٲژ ہُنٛد درجہٕ حرارت منفی 5.3 ڈگری سیلسیس ریکارڈ کرنہٕ آو، تہٕ اننت ناگ ضِلعَس منٛز آو رٲژ ہُنٛد درجہٕ حرارت منفی 4.7 ڈگری سیلسیس ریکارڈ کرنہٕ۔