سرینگرَس منٛز رٲژ درجہٕ حرارتَس منٛز بہتری سۭتۍ ونٛدٕچ شِدَت رَژھ کھنٛڈ کم گٔمٕژ۔

وادی کٔشیٖرِ منٛز یِنہٕ والٮ۪ن دۄہَن منٛز شیٖن پیٚنٕچ پیشن گویی دوران گوٚو رٲژ ہُنٛد درجہٕ حرارت بیٚیہِ اکہِ لٹہِ بہتر، ییٚمہِ سۭتۍ لوٗکَن شدید سردی نِش کینٛہہ راحت میلہِ۔ کشمیر موسمہٕ مُطٲبِق آو رٮ۪تہٕ کالہِ دارالحکوٗمت سرینگرَس منٛز کم از کم درجہٕ حرارت منفی 1.2 ڈگری سیلسیس ریکارڈ کرنہٕ، ییٚلہِ زن پٔتمہِ رٲژ ہُنٛد درجہٕ حرارت منفی 4.7 ڈگری سیلسیس اوس۔ وسطی کشمیرُک سیاحتی مقام سونامر روٗد وادی ہُنٛد سارِوٕے کھۄتہٕ سرد علاقہٕ، یَتھ منٛز کم از کم درجہ حرارت منفی 8.3 ڈگری سیلسیس اوس۔ وادی ہٕنٛدٮ۪ن مشہوٗر سیاحتی مقامات، گُلمرگ تہٕ پہلگامَس منٛز آو کم از کم درجہٕ حرارت بِلترتیب منفی 3.5 ڈگری سیلسیس تہٕ منفی 1.8 ڈگری سیلسیس ریکارڈ کرنہٕ۔ سرحدی ضِلعہٕ کُپواڑہَس منٛز اوس کم از کم درجہٕ حرارت منفی 1.6 ڈگری سیلسیس، ییٚلہِ زَن قاضی گُنٛڈ شَہرَس یَتھ کشمیر ہُنٛد گیٹ وے ونان چھِ، کم از کم درجہٕ حرارت اوس منفی 2.4 ڈگری سیلسیس۔ جنوٗبی کشمیر کٮ۪ن ضِلعن اننت ناگ، پلوامہ تہٕ شوپیانَس منٛز آو رٲژ ہُنٛد درجہٕ حرارت بِلترتیب منفی 3.9 ڈگری سیلسیس ریکارڈ کرنہٕ۔