سپیکر عبدالرحیم رٲتھر تہٕ سٲبقہٕ ممبر پارلیمینٹ عبدالرشید شاہیٖن سُنٛد قومی صدر اکھلیش یادوَس سۭتۍ ملاقات۔

جموں و کشمیر قانون ساز اسمبلی ہٕنٛدِ سپیکر عبدالرحیم رٲتھر تہٕ سینئر سیاست دان تہٕ سٲبقہٕ ممبر پارلیمینٹ عبدالرشید شاہیٖنَن کٔر لکھنَوَس منٛز سماجوادی پارٹی ہٕنٛدِ قومی صدر اکھلیش یادوَس سۭتۍ اکھ باقاعدٕ ملاقات، یَتھ دوران جموں و کشمیرٕچ موجودٕ صورتحالَس پیٹھ تفصیلی بَحَث آیہِ کرنہٕ۔ میٹنگہِ دوران ووٚن جموں و کشمیرٕک سینئر رہنُماہن زِ ‘ریاستس منٛز چھِ انتظٲمی اختیار بیوروکریسی ہٕنٛدٮ۪ن اتھن تام محدوٗد تھاونہٕ آمٕتۍ، تہٕ عوٲمی نمایندَن ہُنٛد کردار چھُ کم کرنہٕ آمُت’۔ تِمَو کوٚر یہِ تہِ الزام زِ ‘جموں و کشمیرَس منٛز چھُ رُشوَت خوری منٛز اضافہٕ گوٚمُت، ییٚلہِ زَن سیاحت، دستکٲری تہٕ مٮ۪وٕچ صنعت چھِ سیٹھاہ مُتٲثِر گٔمٕژ، ییٚمہِ سۭتۍ مقٲمی لوٗکَن ہٕنٛز روزی خطرَس منٛز چھِ’۔ عبدالرحیم راٹھور تہٕ عبدالرشید شاہینَن ووٚن زِ اکھلیش یادوَس چھُ کٔشیٖرِ سان پوٗرٕ مُلکَس منٛز اثر و رسوخ، تہٕ عوامُک بھروسہٕ چھُ تٔمِس پٮ۪ٹھ مضبوٗط۔ تِمَو ووٚن زِ مُلکَس منٛز تبدیٖلی ہِنٛز سِمتُک تعین کَرِ اُتر پردیش، تہٕ لوٗکَن ہٕنٛز نظر چھِ اکھلیش یادوَس کُن۔ اَتھ موقعس پیٹھ دِژ سٲبقہٕ ممبر پارلیمینٹ عبدالرشید شاہین تہِ اکھلیش یادوَس جموں و کشمیر گژھنٕچ دعوت تہٕ وونُن زِ کٔشیٖرِ ہٕندۍ لوٗکھ چھِ سُہ یِنہٕ یژھان۔