حکوٗمتَس پَزِ وَنُن زِ اگنیویرن ہٕنٛز شہادت کیٛازِ چھِ باقٕے فوجیو کھۄتہٕ کم: راہول گاندھی

کانگریس کِس سٲبقہٕ صدر تہٕ لوک سبھاہَس منٛز اپوزیشن لیڈر راہول گاندھی یَن چھُ مہاراشٹر کِس ناسکَس منٛز تربیتَس دوران دۄن اگنیویرَن ہٕنٛدِس مرنَس پٮ۪ٹھ دۄکھُک اِظہار کوٚرمُت تہٕ پرژھمُت زِ کیا حکومت کَرِ باقٕے فوجیَن ہٕنٛدۍ پٲٹھۍ تِمَن عزت تہٕ معاوضہٕ۔
"ناسکَس منٛز تربِیت دِنہٕ وِزِ دۄن اگنیویرَن- گوہل وِشوراج سِنٛگھ تہٕ سیفتِشتا سُنٛد مرُن چھُ اکھ افسوسناک واقعہٕ۔ أمۍ سٕنٛدِس عیالَس سۭتۍ چھِ مےٚ دِلی تعزیت۔ یہِ واقعہٕ چھُ بیٚیہِ اکہِ لٹہِ اگنیویر سکیمَس پٮ۪ٹھ سٔنجیٖدٕ سوال پٲدٕ کران، ییٚمیُک جواب بھارتیہ جنتا پارٹی (بی جے پی) حکومت دِنس منٛز ناکام روٗزمٕژ چھِ۔
تٔمۍ کوٚر سوال زِ کیا گوہل تہٕ صیفت سٕنٛدٮ۪ن عیالَن مِلٮ۪و بروقت معاوضہٕ یُس کٲنٛسہِ بیٚیِس فوجی سٕنٛدِس شہادتس برابر چھُ۔ اگنیویرا کٮ۪ن عیالَن کیٛازِ مِلٮ۪و نہٕ پنشن تہٕ باقٕے سرکٲرِ سٔہوٗلِیاتن ہُنٛد فٲیدٕ؟ ییٚلہِ دۄشوٕنی فوجِین ہِنٛزٕ ذِمہٕ دٲری تہٕ قۄربٲنِیہِ برابر چھےٚ، تیٚلہِ کیٛازِ چھِ یِہنٛدِ شہادتہٕ پتہٕ یہِ فرق؟