اقلیتی برادرین بااختیار بناونُک مقصد

جے کے بینک تہٕ این ایم ڈی ایف سی یس درمیان ایم او یو

کہؤٹ خبر/اطہر ابنِ اطہر

پوٗرٕ مُلکَس منٛز اقلیتی برادرین بااختیار بناونٕکۍ اقداماتَن ہٕنٛدِ حصہٕ پٲٹھۍ چھُ جے کے بینکَن گورنمنٹ آف انڈیا تنظیم، نیشنل مائنریٹی ڈیولپمنٹ اینڈ فنانس کارپوریشن (این ایم ڈی ایف سی) سۭتۍ اکھ معاہدٕ کوٚرمُت۔ دستخط کرنٕچ تقریب آیہِ برٛسوارِ دۄہ دِلہِ ہاٹَس منٛز اقلیتی معاملَن تہٕ پارلیمانی معاملَن ہٕنٛدِس مرکزی وزیر کرن رجیجو سٕنٛزِ سربرٲہی منٛز ‘لوک سموردھن پروا’ کِس افتتاحی تقریٖبہِ دوران مُنعقد کرنہٕ۔ بینکٕکۍ جنرل منیجر تہٕ ڈویژنل ہیڈ (آر او آئی) راجیش گپتا ہَن کوٚر وزارت اقلیتی معاملَن ہٕنٛز سکیم، پروگرام تہٕ کامیٲبی ہاونہٕ خٲطرٕ منعقد أکِس اعلیٰ سطحی تقریبس منٛز این ایم ڈی ایف سی کِس نمایندَس سۭتۍ جنرل لون معاہدس پٮ۪ٹھ دستخط۔ اَتھ پیشرفتس پٮ۪ٹھ خوشی ہُنٛد اِظہار کران ووٚن ایم ڈی تہٕ سی ای او بلدیو پرکاشَن زِ "أسۍ چھِ این ایم ڈی ایف سی یَس سۭتۍ أکِس معاہدس پٮ۪ٹھ دستخط کرنس منٛز واریٛاہ خۄش، یُس پوٗرٕ مُلکَس منٛز اقلیتی برادرین ہٕنٛز معاشی فلاح و بہبود خٲطرٕ سرگرمی سان کٲم کران چھُ۔ یہٕ قرضُک معاہدٕ کرِ سانہِ معاشرس منٛز اقلیتی برادرین معاشی مدد فراہم۔