جموں و کشمیرس تہٕ ہریاناہَس منٛز گژھن اسمبلی اِنتِخابات 6 اکتوبرَس تام

نَیہِ دِلہِ: الیکشن کمیشنَن کوٚر جُمعہ دۄہ جموں و کشمیر تہٕ ہریانہ اسمبلی خٲطرٕ اِنتِخابَن ہُنٛد اعلان، یَتھ منٛز کٔشیٖرِ منٛز 18 ستمبر، 25 ستمبر تہٕ 1 اکتوبر ترٛٮ۪ن مرحلن منٛز ووٹنگ گژھہِ، ییٚلہِ زن ہریانہ ہَس منٛز ریاستٕچ تمام سیٹَن پٮ۪ٹھ یکم اکتوبر ووٹنگ گژھہِ۔ دۄشوٕنی رِیاستی ایٚسمبلی ہِنٛدِ ووٹن ہِنٛز گنتی یِیہِ 4 اکتوبر کرنہٕ۔
چیف الیکشن کمشنر راجیو کمار، الیکشن کمشنر گیانیش کمار تہٕ ڈاکٹر سکھبیر سنگھ سندھوَن ووٚن ییٚتہِ أکِس پریس کانفرنسَس منٛز زِ جموں و کشمیرَس منٛز چھُ اِلیکشنُک دور لوک سبھا اِنتِخابَو نِش کم تھونہٕ آمُت۔ مركزی زیر انتظام علاقن منٛز آیہِ لوک سبھا اِنتِخابات پانٛژن مرحلن منٛز مُنعقد کرنہٕ۔
کُمارن ووٚن زِ 90 رکنی جموں و کشمیر اسمبلی اِنتِخابات کِس گۄڈٕنِکِس مرحلَس منٛز 24 سیٹَن ہُنٛد نوٹیفکیشن یِیہِ 20 اگست امرناتھ جی یاترا ختم گژھنہٕ پتہٕ دۄہ جٲری کرنہٕ تہٕ 27 اگست تام یِن نامزدگی کاغذ دٲخل کرنہٕ۔ نامزدگی کاغذن ہٕنٛز چھان بین یِیہِ 28 اگست کرنہٕ۔