جموں و کشمیر اسمبلی انتخابات : راہول گاندھی تہٕ ملک ارجن کھڑگے سُنٛد کارکُنَن سۭتۍ مُلاقات ۔

سری نگر، 22 اگست

لوک سبھاہَس منٛز اپوزیشن لیڈر تہٕ کانگریس لیڈر راہول گاندھی کَرِ جموں و کشمیرَس منٛز اسمبلی اِنتِخابات برٛونٛہہ ییٚتہِ ہوٹل ریڈیانَس منٛز پارٹی کارکُنَن سۭتۍ کَتھ باتھ۔ اَتھ موقعَس پٮ۪ٹھ روزِ کانگریسُک صدر ملک ارجن تہِ اتھ کتھہِ باتھہِ منٛز موٗجوٗد۔ وادی کشمیر کٮ۪و مُختٔلِف ضِلَو پٮ۪ٹھٕ چھِ کانگریسٕکۍ کارکُن اجلاسَس منٛز شٲمِل گژھنہٕ خٲطرٕ ہوٹلَس منٛز وٲتمٕتۍ تہٕ اجلاسَس منٛز شِرکت کرنہٕ باپتھ لٲنہِ منٛز کھڑا ۔پارٹی ذٔرایعن ووٚن زِ میٹنگہِ دوران دِیہِ راہول گاندھی کارکُنَن اسمبلی اِلیکشنٕچہِ مُہِمہ منٛز کٲم کرٕنٕچ تہٕ کَمَن معاملَن پٮ۪ٹھ لوکَن نِش ووٹ منٛگنس مُتعلِق زانکٲری ۔ جموں و کشمیر پردیش کانگریس کمیٹی (جے کے پی سی سی) کِس صدر طارق قراہن ووٚن زِ یہِ چھِ کارکُنَن ہُنٛد اجلاس تہٕ ووٚن زِ یوٗتاہ زِیٛادٕ کارکُن ہٮ۪کَن اَتھ منٛز شٲمِل گژھِتھ۔راہول گاندھی کَرِ أکِس پریس کانفرنسَس منٛز تہِ تقریر۔ راہول گاندھی ووت پارٹی صدر ملیک ارجن کھڑگے یَس سۭتۍ بۄدوارِ دۄہہٕ شامَس سری نگر۔