نوگام پُلیٖس تھانہٕ حٲدثٲتی دھماکہٕ: مُتٲثِریٖنَن چھِ پرٛٮ۪تھ مُمکِنہٕ مدد فراہم کرنہٕ یِوان: منوج سنہا

جموں و کشمیرٕکۍ لیفٹیننٹ گورنر منوج سنہاہَن کوٚر نوگام پولیس تھانس منٛز افسوسناک حادثاتی دھماکَس پٮ۪ٹھ سٮ۪ٹھاہ دۄکھُک اظہار تہٕ ووٚنُن زِ مُتٲثریٖنَن چھِ ہر ممکن مدد فراہم یِوان کرنہٕ۔

تٔمۍ ووٚن زِ حکوٗمت چھِےٚ تِمَن ہٕنٛدٮ۪ن عیالَن، بٲژن تہٕ عزیزَن سۭتۍ یکجہتی سان کھڑا ۔

قٲبلِ ذِکِر چھُ زِ راتھ رٲژ گوٚو نوگام پولیس تھانس منٛز اکھ حٲدثٲتی دھماکہٕ، یَتھ منٛز 9 افراد ہلاک تہٕ باقی 32 زخمی گٔے، یِمَو منٛز زیادٕ تر پولیس اہلکار ٲسۍ۔

‘X’ پٮ۪ٹھ أکِس پوسٹَس منٛز اتھ واقعَس پٮ۪ٹھ دۄکھُک اِظہار کٔرِتھ ووٚن منوج سنہاہَن زِ: ‘سرینگر کِس نوگام پُلیٖس تھانس منٛز اِنتِہٲیی افسوسناک حٲدثٲتی دھماکہٕ کِنۍ قۭمتی جانَن ہٕنٛدِس نۄقصانَس پٮ۪ٹھ چھُ سٮ۪ٹھاہ غم تہٕ افسوس۔

تٔمۍ کوٚر سوگوار خاندانَن سۭتۍ تعزیتُک اظہار تہٕ زخمیَن ہٕنٛز جلد صحت یابی خٲطرٕ دُعا۔

تٔمۍ ووٚن: ‘حکومت چھِ تِمَن ہٕنٛدٮ۪ن عیالَن، یارَن تہٕ ٹٲٹھن سۭتۍ یکجہتی منٛز کھڑا ۔’