نوگام دھماکہٕ: تباہ شدٕ مکانَن ہُنٛد پوٗرٕ معاوضہٕ یِیہِ دِنہٕ: وزیر اعلیٰ عمر عبداللہَن کوٚر اعلان

جموں و کشمیرٕکۍ وزیر اعلیٰ عمر عبداللہ ہن ووٚن زِ جُمعہ دۄہ رٲژ حادثاتی دھماکَس منٛز نۄقصان گٔمٕتی نوگام پولیس تھانس نزدیٖک رہٲیشی تہٕ تجٲرتی ڈھانچَن خٲطرٕ یِیہِ پوٗرٕ معاوضہٕ دِنہٕ۔ تٔمۍ ووٚن زِ انتظامیہ چھُ مُتٲثِر خاندانَن سۭتۍ کھڑا تہٕ کرِ تمام مُمکِن مدد۔
وزیر اعلیٰ ووٚن زِ حکومت چھےٚ نوگامَس منٛز یتھ افسوسناک واقعس منٛز پنٕنۍ جان راوٕنۍ تِمَن شہریَن ہِنٛدٮ۪ن عیالَن سۭتۍ کھڑا تہٕ کرِ تِمن ہر مُمکِن مدد۔ وزیر اعلیٰ ہن چُھ وزیرِ صحت سکیٖنہ اِیتوہس ہدایت دِیُتمُت زِ سُہ کٔرِن یہِ یٔقیٖنی زِ زخمیَن ہٕنٛدِس علاجَس منٛز گژھِ نہٕ کانٛہہ تہِ لاپرواہی کرنہٕ یِنۍ تہٕ مُتٲثِر عمارتَن تہٕ گَرَن ہِنٛدِس نۄقصانس یِیہِ سرکٲرۍ طور معاوضہٕ دِنہٕ
طاقتور دھماکہٕ گوٚو جُمعہ رٲژ تَمہِ وِزِ ییٚلہِ تفتیشی ایجنسیَن ہُنٛد اکھ ٹیم ‘وائٹ کالر ٹیررازم’ کیسَس تحت ضبط کرنہٕ آمٕتۍ دھماکہٕ خیز مادٕ منٛزٕ نمونہٕ کڑنَس منٛز آوُر اوس۔ یہِ مواد اوس نوگام پولیس تھانہ کِس احاطس منٛز جمع کرنہٕ آمُت۔