پروفیسر سیف الدین سوزَن کوٚر نوگام دھماکَس منٛز جٲنی نۄقصانَس پٮ۪ٹھ سٮ۪ٹھاہ غمُک اظہار

سٲبقہٕ مرکزی وزیر تہٕ کانگریسٕک رہنُما پروفیسر سیف الدین سوزَن کوٚر بَٹہٕ وارِ دۄہ سرینگر کِس نوگام پُلیٖس تھانس منٛز حادثٲتی دھماکَس منٛز کم کھۅتہٕ کم نَو جٲنی تہٕ 29 باقٕے زخمی گژھنَس پٮ۪ٹھ سٮ۪ٹھاہ غمُک اِظہار۔
یَتہِ جٲری کَرنہٕ آمتِس أکِس بیانَس منٛز کوٚر سوزَن نوگام پُلیٖس تھانہٕ کِس دھماکَس منٛز نَو جٲنی ضایع گژھنس پٮ۪ٹھ سٮ۪ٹھاہ غمُک اِظہار۔ بیانَس منٛز دیُت تٔمۍ یہِ واقعہٕ خوفناک تہٕ سٮ۪ٹھاہ افسوسناک قرار تہٕ کوٚرُن سوگوار خاندانَن سۭتۍ دِلی تعزیت۔
پروفیسر سوزَن دِیُت انتظامیہس پٮ۪ٹھ تہِ زور زِ سُہ کٔرِن مُتٲثِرین ہِنٛدٮ۪ن عیالَن فوری معاوضہٕ فراہم تہٕ دھماکَس منٛز زخمی گژھن والٮ۪ن خٲطرٕ بہترین طبی دیکھ بھال تہٕ مدد بنٲوِنۍ یٔقیٖنی۔