گاندربلَس منٛز منشیات فروش گِرِفتار، ممنوعہ مادٕ برآمد: پولیس

معاشرَس منٛز نشاور ادوِیات ختم کرنٕچ جٲری مُہمہِ منٛز چُھ گندر بل پولیسَن اکھ منشیات فروش گِرِفتار کوٚرمُت تہٕ أمِس نِش چھُ بٔڑِس مقدارَس منٛز ممنوعہ چیز برآمد کرنہٕ آمُت۔پُلیس ترجمانَن ووٚن أکِس بیانَس منٛز زِ گندر بل پُلسہٕ تھانہٕ کہِ أکہِ ٹیٖمَن رُکوو اکھ شخٕص وٲیل کٔدلس پٮ۪ٹھ ۔

تِمَو ووٚن زِ تلٲشی دوران آو أمۍ سٕنٛدِس قبضَس منٛز بنٛگَس ہِیُو ممنوعہ مادٕ برآمد کرنہٕ، ییٚمہِ پتہٕ سُہ فوری طور موقعہٕ جایہِ پٮ۪ٹھ گِرِفتار کرنہٕ آو۔

مُلزِم سٕنٛز شناخت چھےٚ بدرکنڈ، گاندر بلٕک روزَن وٲلِس محمد اشرف خان سُنٛد نیٚچُو گُلزار اشرف خان ناوٕ سۭتۍ کرنہٕ آمٕژ۔

پُلیٖس ترجمانَن ووٚن زِ اَتھ سلسلَس منٛز چھُ گندر بل پُلسہٕ تھانس منٛز این ڈی پی ایس ایکٹ کِس مُتعلقہٕ دفعَن تحت ایف آئی آر نمبر 196/2025 سۭتۍ مقدمہٕ درٕج کرنہٕ آمُت، تہٕ مٔزیٖد تفتیش چھےٚ شُروٗع کرنہٕ آمُت۔

تِمَو ووٚن زِ پولیس چھُ ضِلعس منٛزٕ نشاور ادوِیات ختم کرنُک عزم تھاوان۔