جموں و کشمیر کٮ۪ن سکوٗلَن منٛز وندٕ چھُٹی ہُنٛد اعلان

محکمہٕ تعلیمَن کوٚر بوموارِ دۄہ کشمیر تہٕ جموں ڈویژن کِس ونٹر زونَس منٛز واقعہٕ تمام سرکٲرۍ تہٕ تسلیم شُدٕ پرائیویٹ سکوٗلَن خٲطرٕ وندٕ چھُٹی ہُنٛد شیڈول باضٲبطہٕ طور جٲری۔
جٲری کرنہٕ آمتہِ شیڈول مُطٲبِق روزِ پری پرائمری کلاس 26 نومبر 2025 پٮ۪ٹھٕ 28 فروری 2026 تام بنٛد۔ یِتھے پٲٹھۍ چھِ اکہِ پیٹھٕ ٲٹھمہِ جمٲژ خٲطرٕ وندٕ چھُٹی 1 دسمبر 2025 پٮ۪ٹھٕ 28 فروری 2026 تام مقرر کرنہٕ آمٕژ۔
نٔوِمہِ پیٹھٕ بٔہمہِ جمٲژ خٲطرٕ چھِ چھُٹی 11 دسمبر 2025 پٮ۪ٹھٕ 22 فروری 2026 تام مقرر کرنہٕ آمٕژ۔
محکمَن کوٚر یہِ تہِ واضح زِ چھُٹین دوران گژھِ تمام تدریسی فیکلٹی کُنہِ تہِ تعلیمی مشن یا ضرورتہٕ خٲطرٕ دستیاب روزٕنۍ۔ اَمِہ علاوٕ چھُ تدریسی عملَس ہدایت دِنہٕ آمُت زِ تِم کٔرِنۍ 20 فروری 2026 تام پننٮ۪ن متعلقہٕ ادارن واپس رپورٹ تاکہ سکول دُبارٕ کھولنٕچ تیٲری ییہِ کرنہٕ۔
اعلانَس منٛز چھُ اکھ وارننگ تہِ شٲمِل زِ اگر کُنہِ ادارُک کانٛہہ سربراہ یا سٹاف رُکُن مُقرر وندٕ شیڈولٕچ خلاف ورزی کرِ، تِمَن خلاف یِیہِ سخٕت کاروٲیی کرنہٕ۔