سرینگر پولیسَن کٔر طِبی اِدارَن منٛز ڈاکٹرَن ہٕنٛدٮ۪ن لاکرَن تلٲشی۔

شہرٕکٮ۪ن طِبی اِدارَن منٛز شفافیت، جوابدہی تہٕ مجموعی حِفاظت بڑاونہٕ خٲطرٕ کٔر سریٖنگر پولیسَن محکمہٕ صحت کٮ۪ن طِبی افسرَن سۭتۍ مُشترکہٕ کارروٲیِیَن منٛز ڈاکٹرَن تہٕ طِبی عملَن ہِنٛدِ دٔسۍ اِستعمال کرنہٕ یِنہٕ والٮ۪ن لاکرَن نشانہٕ بناوَن واجنہِ اچانک تہٕ جامع لاکر تلٲشی ہٕنٛز مُہِم شُروٗع۔
یہِ معٲینہٕ آو ضِلعہٕ تہٕ پرائیویٹ ہسپتالَن، میڈیکل کالجَن، پرائمری ہیلتھ سینٹرَن تہٕ باقٕے طبی سہولیاتن منٛز کرنہٕ۔ امیُک مقصد اوس لاکرَن ہُنٛد غلط استعمال یا غٲر مجاز استعمال رُکاوُن، مشکوک مواد ذخیرٕ کرنُک امکان ختم کرُن، تہٕ طبی ادارن انٛدر اندرونی سلامتی مٔزیٖد مضبوٗط کرٕنی۔
پُلیٖس تہٕ مُتعلقہٕ طِبی ٹیٖمَو کٔر تمام رینکَن تہٕ لاکرَن ہُنٛد تفصیٖلی معائنہٕ، ییٚلہِ زَن سٹافس آو ہدایت دِنہٕ زِ تِم تھٲوِنی لاکر استعمال کرنُک مُکمل ریکارڈ تہٕ یِم صِرف سرکٲرۍ تہٕ پیشہٕ ورانہٕ مقصدَن خٲطرٕ استعمال سپدن۔
حکامَو کوٚر واضح زِ امہِ قٕسمٕچ تلٲشی ہٕنٛز مُہِم روزِ مستقبلَس منٛز معموٗل معٲینُک حصہٕ ، ہسپتالَن منٛز محفوظ، شفاف تہٕ منظم ماحولَس یقینی بناونہٕ خٲطرٕ۔