گُنڈبل ناو حٲدِثہٕ: دۄیو ؤرۍ یَو پتہٕ شوکت احمد شیخ سٕنٛز لاش جہلم دٔریاوٕ منٛزٕ برآمد ۔

2024 کِس افسوسناک گُنڈبل ناوِ حٲدِثس منٛز لاپتہ گٔمٕژ شوکت احمد شیخ سٕنٛز لاش آیہِ ژٔندٕروارِ دۄہ جہلم دٔریاوٕ منٛزٕ برآمد کرنہٕ، ییٚمہِ سۭتۍ واریاہَو رٮ۪تَو پٮ۪ٹھ جٲری تلاشَس ختٕم گٔیہِ۔
مقٲمی بسکیٖنَو دِژ اطلاع زِ حادثہٕ پتہٕ لاپتہ شوکت احمد سٕنٛز لاش آیہِ آز حادثہٕ جایہِ نزدیٖک دٔریاو کِس أکِس حصَس منٛز وُچھنہٕ۔ تِمو کٔر یہِ بازیافت تہٕ کوٚرُکھ پولیسَس حوالہٕ۔
اَمہِ برٛونٛہہ، مارکس تہٕ ایس ڈی آر ایفٕک کیوٗ آر ٹیٖمَن ٲس جٔدیٖد سازو سامان کہِ مدتہٕ سۭتۍ واریاہَن دۄہَن جہلم دٔریاوَس سٮ۪ٹھاہ سرٛنٮ۪رَس تام تلاش کٔرمٕژ، مگر تَمہِ وِزِ ہیوٚک نہٕ کانٛہہ کامیٲبی حٲصِل۔
لاش برآمد گژھنہٕ پتہٕ کوٚر مقٲمی لوکو غمُک اظہار کران زِ واریاہ رٮ۪تھ گزرنہٕ باوجوٗد تہِ اوس عیالس وۄمید زِ لاش یِیہِ ٲخٕر کار لبنہٕ۔
یہِ چھُ قٲبلہِ ذِکِر زِ گُنٛڈبل ناوِ ہُنٛد حٲدِثہٕ چھُ حالَے ؤرۍ یَن منٛز سرینگرَس منٛز بدترین واقعہٕ ماننہٕ یِوان، یَتھ منٛز شُرۍ ہٮ۪تھ ٲٹھ نَفر مارٕ گٔیہِ۔