کٔشیٖرِ منٛز ونٛدٕ تیز ، سونہ مرگ سارِوٕے کھۄتہٕ سرد علاقہٕ۔

محکمہ موسمیات کہِ طرفہٕ یِنہٕ والٮ۪ن دۄہَن منٛز بٔڑِس پیمانَس پٮ۪ٹھ شیٖن پیٚنٕچ پیشن گویی دوران چھُ وادی کٔشیٖرِ منٛز سخت سردی ہُریومُت، ییٚمہِ سۭتۍ لوٗکَن ہٕنٛز زِنٛدگی مُشکِل گٔیہِ۔ محکمہٕ موسمیات مُطٲبِق روٗد وادی منٛز سیاحتی مقام سونامر سارِوٕے کھۄتہٕ سرد علاقہٕ، ییٚتہِ کم از کم درجہٕ حرارت منفی 6.2 ڈگری سیلسیس ریکارڈ کرنہٕ آو۔

رٮ۪تہٕ کالہِ ہٕنٛز رازدٲنی سرینگرَس منٛز اوس رٲژ ہُنٛد درجہٕ حرارت منفی 3.4 ڈگری سیلسیس ریکارڈ کرنہٕ آمُت، ییٚلہِ زن پٔتمہِ رٲژ منفی 1.2 ڈگری سیلسیس اوس۔

وادی ہٕنٛدٮ۪ن مشہوٗر سیاحتی مقامات، گُلمرگ تہٕ پہلگامَس پٮ۪ٹھ آو رٲژ ہُنٛد درجہٕ حرارت بِلترتیب منفی 5.5 ڈگری سیلسیس تہٕ منفی 4.0 ڈگری سیلسیس ریکارڈ کرنہٕ۔

کُپواڑہ کِس سرحدی ضِلعَس منٛز آو کم از کم درجہٕ حرارت منفی 1.2 ڈگری سیلسیس ریکارڈ کرنہٕ، ییٚلہِ زَن قاضی گُنٛڈ شَہرَس یَتھ کشمیر گیٹ وے ونان چھِ، رٲژ ہُنٛد درجہٕ حرارت آو منفی 2.3 ڈگری سیلسیس ریکارڈ کرنہٕ۔

جٔنوٗبی کٔشیٖرِ ہِنٛدٮ۪ن ضِلعن اننت ناگ، پلوامہ، شوپیاں تہٕ کُلگامَس منٛز آو کم از کم درجہٕ حرارت بِلترتیب منفی 4.5 ڈگری سیلسیس، منفی 5.5 ڈگری سیلسیس تہٕ منفی 4.8 ڈگری سیلسیس ریکارڈ کرنہٕ۔