کٲشِرِ پنڈت اگر یَژھن فوراً ہٮ۪کن واپس یِتھ، مگر حقیقت چھِ یہِ زِ تِہٕنٛز زِنٛدگی چھےٚ وۄنۍ بیٚیہِ کُنہِ جایہِ آباد گٔمٕژ: فاروق عبداللہ

جموں و کشمیر نیشنل کانفرنسُک صدر تہٕ سٲبقہٕ وزیر اعلیٰ ڈاکٹر فاروق عبداللہ ہن ووٚن زِ کٲشِرۍ پنڈتَن وادی منٛز واپس یِنَس پیٹھ چھُنہٕ کانٛہہ پابنٛدی تہٕ اگر تِم واپس یِنۍ یژھان چھِ، کٔشیٖر چھِ تِمن ہِنٛدِ خٲطرٕ ہمیشہٕ یَلہٕ۔ تاہم، تٔمۍ کٔر تشویش ہُنٛد اظہار زِ ترٛیٚیو ؤریو پتہٕ، زیادٕ تر خاندان ہیکن نہٕ وادی منٛز مستقل طور آباد گژھنُک ارادٕ تھاوان، تِکیازِ تِمو چھِ مُلکہٕ کٮ۪ن مختلف حصن منٛز پنٕنۍ نٔو زندگی قٲیم کٔرمٕژ۔
یہِ بیان آو تَمہِ وِزِ ییٚلہِ کٲشِرۍ پنڈت برادری 1990 تھس منٛز بٔڑِس پیمانَس پٮ۪ٹھ ہجرت کِس یادس منٛز 19 جنوری ‘ہولوکاسٹ ڈے’ مناوان ٲس- اکھ دۄہ ییٚلہِ دہشت گرد حملَو تہٕ مہلک خطرَو سۭتۍ ساسہٕ بٔدۍ خاندان پنٕنۍ گَرٕ ترٛاونَس پٮ۪ٹھ مجبوٗر گٔیہِ۔
جوٚمَس منٛز پارٹی ہٕنٛدِس دوٚن دۄہَن ہِنٛزِ اِجلاسَس دوران میڈیاہَس سۭتۍ کَتھ باتھ کٔرِتھ ووٚن فاروق عبداللہ ہَن زِ تِم کُس چھُ رُکاوان؟ یہِ چھُ تِہُنٛد پنُن وطن۔ یِم واپس یَژھان چھِ تِم ہیکَن آزادانہٕ طور یِتھ۔ واریاہ کٲشِرۍ پنڈت چھِ از تہِ وادی منٛز پننٮ۪ن گَرن منٛز روزان’۔