جموں و کشمیرَس منٛز چھُ 10 اکتوبرَس تام روٗد پٮ۪نُک تہٕ تیز واویِنُک امکان،ہیٚرمٮ۪ن علاقن منٛز شیٖن پیٚنٕچ پیشگویی

محکمہٕ موسمیاتَن چھُ اِشارٕ دِیُتمُت زِ 6 پٮ۪ٹھٕ 10 اکتوبرَس تام ہیکہِ واو 40 پیٹھٕ 50 کلومیٹر فی گھنٹہٕ رفتارِ سان پٔکِتھ تہٕ 10 اکتوبرَس تام چھُ جموں و کشمیر کٮ۪ن مٲدٲنی علاقَن منٛز ہلکہٕ پٮ۪ٹھٕ درمیٲنی روٗد پیٚنُک امکان، ییٚلہِ زَن ہیٚرمٮ۪ن علاقَن منٛز شیٖن پیٚنُک امکان چھُ۔ موسمس منز تبدیلی کِنۍ چھُ درجہٕ حرارت کم گژھنُک امکان۔ 4 اکتوبر آو کٔشیٖرِ منٛز دۄہُک زیادٕ کھۄتہٕ زِیٛادٕ درجہٕ حرارت تقریباً 31 ڈگری سیلسیس ریکارڈ کرنہٕ، یُس اَوسَط کھۄتہٕ واریاہ ڈگری زیادٕ اوس۔

سرینگرَس منٛز وون محکمہ موسمیات (آی ایم ڈی) کیو حکامَو زِ 6 پٮ۪ٹھٕ 10 اکتوبر دُپہرَس تام چھُ جموں و کشمیرَس منٛز ہلکہٕ پٮ۪ٹھٕ درمیٲنی روٗد پیٚنُک امکان۔ آی ایم ڈی سری نگرٕکۍ مٲہرِ موسمیات پروین کمارَن ووٚن زِ ‘مٲدٲنی علاقَن منٛز ہیکہِ کینٛژھن جایَن پٮ۪ٹھ ہلکہٕ پٮ۪ٹھٕ درمیٲنی روٗد پیٚتھ، تہٕ ہیٚرمٮ۪ن علاقَن منٛز چھُ ہلکہٕ پٮ۪ٹھٕ درمیٲنی شیٖن پیٚنُک امکان۔

تٔمۍ ووٚن یِتہِ زِ 6 اکتوبر پٮ۪ٹھٕ 9 اکتوبر صُبحس تام چھُ تیز واو یِنُک امکان، یَتھ منٛز رفتار 40 پیٹھٕ 50 کلومیٹر فی گھنٹہٕ تام ہیٚکہِ ٲسِتھ۔