کٔشیٖرِ منٛز خۄشٕک موسمَس منٛز ونٛدٕ تیز گژھنہٕ کِنۍ گُلمرگہ منٛز منفی 9.8 ڈگری سیلسیس ریکارڈ ۔

وادی کشمیرُک موسم چھُ دۄہَس خۄشٕک تہٕ تاپھ آسان، مگر رٲژ ہُنٛد درجہٕ حرارت منجمد گژھنہٕ کہِ وقتہٕ کھۄتہٕ کم آسنہٕ کِنہِ چھِ لُکھ پوٗرٕ رٲژ شٔدیٖد ونٛدَس منٛز جدوجہد کران۔ محکمہٕ موسمیات چہِ پیشن گویی مُطٲبِق چھُنہٕ 15 جنؤری تام وادی منٛز موسمَس منٛز کانٛہہ تہِ بٔڑ تبدیلی ہُنٛد اِمکان۔ مُتعلقہٕ محکمہٕ کِس ترجُمانَس مُطٲبِق روزِ وادی ہُنٛد موسم 10 جنؤریَس تام خۄشٕک روزنُک اِمکان۔ تٔمۍ ووٚن زِ پتہٕ روزِ وادی منٛز 11 تہٕ 12 جنوری موسم اوٚبُر تہٕ ہلکہٕ شیٖن پیٚنُک اِمکان ییٚلہِ زن جموں کٮ۪ن مٲدٲنی علاقن منٛز روٗد پیٚنُک اِمکان چھُ۔ تٔمۍ ووٚن زِ وادی ہُنٛد موسم روزِ 13 پٮ۪ٹھ 15 جنوری تام بیٚیہِ اکہِ لٹہِ خۄشٕک روزنُک امکان۔
محکمَن چھُ پنِنِس مشورَس منٛز مسافرَن تہٕ ٹرانسپورٹرَن ووٚنمُت زِ تِم کرَن ٹریفک ایڈوائزری مُطٲبِق پننٮ۪ن سفرَن ہُنٛد منصوٗبہٕ۔ أتھہِ دوران چُھ صاف موسم آسنہٕ کِنہِ وادی ہُنٛد رٲژ ہُنٛد درجہٕ حرارت بیٚیہِ اکہِ لٹہِ کم گوٚمُت۔