اُدھم پوٗر کِس جوفر علاقَس منٛز چھِ دۄیمہِ دۄہ تہِ آپریشن جٲری۔

جموں و کشمیر کِس اُدھم پوٗر ضِلعہٕ کِس جوفر علاقَس منٛز روٗد برٛسوارِ دۄہ دۄیمہِ دۄہ تلاشی کاروٲیی جٲری، ییٚتہِ سیکورٹی فورسَن تہٕ دہشت گردن راتھ تقریباً دۄن گٲنٛٹَن تام گولہِ چلٲوِ۔
ذٔرایعو ووٚن زِ رٲژ ہِنٛدِ انہِ گوٚٹ آسنہٕ کِنہِ آیہِ آپریشن رُکاونہٕ، مگر برٛسوارِ دۄہ صُبحٲے گۄڈٕنِچہِ لایٹہِ سۭتہِ آیہِ تلاشی آپریشن بیٚیہِ شُروٗع کرنہٕ۔
راتھ شامَس کٔر صحافیَن سۭتۍ کَتھ کران ایس ایس اُدھم پوٗر امود ناگپوٗریَن ووٚن زِ فوجس مِلییہِ بۄدوارِ دۄہ صُبحٲے اطلاع زِ دہشت گرد چھِ جوفر کٮ۪ن گٔنٮ۪ن جنٛگلَن منٛز ژوٗرِ روزان۔