جموں و کشمیر: اوڑی منٛز پاکستان طرفہٕ گولہٕ بٲری کِنۍ خوتون ازجان،3 زخمی۔

شُمٲلی کشمیر کِس بارہمولہ ضلعہٕ کِس اڑی علاقس منٛز رٲژ دوران سرحدٕ پارٕ پٮ۪ٹھ زبردست گولہ باری سۭتۍ اکھ زنانہٕ ہلاک تہٕ باقی ترٛےٚ زخمی گٔیہِ۔ حکامَو دِژ اطلاع زِ اُڑی کِس راجوار علاقَس منٛز گٔیہِ پٲکِستٲنہِ فوجٕکہِ گولہٕ بٲری ہِنٛدِس نٔتیٖجس منٛز اَکھ زنانہٕ مارٕ، ییٚلہِ زن باقٕیہ ترٛےٚ زخمی گٔیہِ۔ مرن واجیٚنہِ زنانہِ ہِنٛز شناخت چھےٚ نرگِس بشیر ناوٕ سۭتہِ کرنہٕ آمٕژ۔ تِمو ووٚن زِ برٛسوارِ دۄہ تہٕ جُمعہ دۄہ درمِیان رٲژ گٔیہِ بارہمولہ، کُپواڑہ تہٕ بانڈی پورہ ضِلعن منٛز لائن آف کنٹرولَس پٮ۪ٹھ پٲکِستٲنہِ فوجٕچ گولہٕ بٲری۔ تِمو کوٚر ذِکِر زِ اَمہِ کِس نٔتیٖجس منٛز گٔیہِ لُکھ محفوٗظ مُقامَن پٮ۪ یہِ چھُ قٲبلِ ذِکر زِ 22 اپریل پہلگامَس منٛز دہشت گرد حملہٕ پتہٕ گوٚو ہندوستان تہٕ پاکستانَس درمیان تناؤ بڑٮ۪و، تہٕ سرحَدن پٮ۪ٹھ گوٚو گولہٕ باری ہُنٛد تبادلہٕ شروع۔