بانڈی پورہَس منٛز خوفناک نار، 4 مکان تہٕ اَکہِ درجن کھۄتہٕ زِیٛادٕ دُکان خاکستر ۔

شُمٲلی کشمیر کِس بانڈی پورہ ضلعہٕ کِس سونا واری سونبل علاقَس منٛز رٲژ نار لگنہٕ کِس أکِس خوفناک واقعَس منٛز چھِ 4 رہائشی مکانات تہٕ اکھ درجن کھۄتہٕ زِیٛادٕ دُکان راکھ بناونہٕ آمٕتۍ۔ ذٔرایعو ووٚن زِ سونا واری سونبل علاقہٕ کِس مرکزی بازرَس منٛز لوٚگ رٲژ نار، تہٕ نارَو لٔج جلدٕی نزدیٖکی عمارتَن یِمَن منٛز رہائشی تہٕ تجٲرتی ڈھانچہٕ تہِ شٲمِل چھِ۔ تِمَو کوٚر ذِکِر زِ شعلہٕ ٲسۍ یوٗتاہ زِیٛادٕ زِ تِم ہٮ۪کَو دوٗر پٮ۪ٹھٕ ؤچھِتھ۔ فائر اینڈ ایمرجنسی ڈپارٹمنٹٕکۍ أکۍ اہلکارَن ووٚن زِ نار لگنٕچ اطلاع مِلنہٕ پتہٕ آیہِ فائر ٹینڈر جایہِ پٮ۪ٹھ سوزنہٕ۔ تٔمۍ کوٚر ذِکِر زِ فائر ٹینڈر، پُلیٖس تہٕ مُقٲمی لُکن ہِنٛدِ مدتہٕ سۭتۍ آو نار قوبوٗ کرنہٕ۔ تِمَو ووٚن زِ نار لگنہٕ کِس یَتھ واقعَس منٛز آیہِ 4 رِہٲیشی ڈانٛچہٕ تہٕ واریاہ دُکان زالنہٕ۔ وۄنٛہِ گوٚو، اَتھ واقعَس منٛز چھُنہٕ کانٛہہ تہِ جٲنی نۄقصانٕچ اطلاع دِنہٕ آمٕژ، تہٕ نار لگنٕکٮ۪ن وجوٗہاتن ہِنٛز چھِ تحقیٖق یِوان کرنہٕ۔ أتھہِ دوران چُھ پُلیٖسن اَتھ مُتعلِق اکھ مُقدِمہٕ درٕج کوٚرمُت تہٕ چُھ کاروٲیی شُروٗع کٔرمٕژ۔