شوپیانَس منٛز زٕ مشتبہ نفر گِرِفتار، ہتھیار تہٕ گولہٕ باروٗد برآمد: پُلیٖس

پُلیٖسن چُھ ووٚنمُت زِ حِفاظتی فوجن چُھ جٔنوٗبی کٔشیٖر کِس شوپِیان ضِلعس منٛز زٕ مشتبہ نفر گِرِفتار کٔرِمٕتہِ تہٕ یِہنٛدِ قبضہٕ منٛزٕ ہتھیار تہٕ گولہٕ باروٗد برآمد کوٚرمُت۔ شوپیاں پولیسَن کٔر ‘ایکس’ پٮ۪ٹھ أکِس پوسٹہٕ ذٔریعہٕ معلوٗمات فراہم یَتھ منٛز وَنُن چھُ زِ ‘دہشت گردی خٕلاف أکِس اَہَم آپریشنَس منٛز کٔر ایس او جی شوپیان، سی آر پی ایفٕچ 178 بٹالین تہٕ فوجٕچ 34 آر آر یَن پٮ۪ٹھ مشتمل ٹیمَن أکِس چیک پوسٹَس پٮ۪ٹھ زٕ مشتبہ افراد گِرِفتار ۔ تِمَو ووٚن زِ تلٲشی دوران آیہِ یِہنٛدِ قبضہٕ پٮ۪ٹھٕ ہتھیار تہٕ گولہٕ باروٗد برآمد کرنہٕ، یِمَن منٛز 4 گرینیڈ، 2 پستول، 43 راؤنڈ تہٕ باقی مُجرِمانہٕ سامان شٲمِل چھِ۔ پوسٹَس منٛز چھُ ذِکِر کرنہٕ آمُت زِ اَتھ مُتعلِق چھُ اکھ کیس درٕج کرنہٕ آمُت، تہٕ تحقیقات چھِ شُروٗع گٔمٕژ۔