اننت ناگس منٛز این ڈی پی ایس ایکٹس تحت غٲر منقولہ جائیداد ضبط: پولیس

منشیاتن خٕلاف کریک ڈاؤن جٲری تھٲوِتھ چھِ پولیسَن این ڈی پی ایس ایکٹس تحت جنوبی کشمیر کِس اننت ناگ ضلعس منٛز أکِس ڈرگ ڈیلرس سۭتۍ تعلق تھاون وٲلۍ لچھن رۄپیَن ہٕنٛز غیر منقولہ جائیداد ضبط کٔرمٕژ۔ پولیس ترجمانَن ووٚن أکِس ریلیزَس منٛز زِ اننت ناگ پولیسَن چھِ این ڈی پی ایس ایکٹ 1985 کِس دفعہ 68 – ایف (1) تحت أکِس بدنام ڈرگ ڈیلر سٕنٛز غیر منقولہ جائیداد ضبط کٔرمٕژ۔ تِمَو کوٚر ذِکِر زِ اننت ناگ کِس بنگیدار میر دانتارَس منٛز واقعہٕ یہِ جائیداد چھِ بوٹ کالونی کھنہ بال کِس روزَن وٲلِس عبدالرشید فاشو سٕنٛدِس نیٚچوِس پرویز احمد فاشوَس سۭتۍ تعلُق تھاوان۔ تِمَو ووٚن زِ مُلزِم چھُ عادتہٕ مُجرِم تہٕ أمِس خٕلاف چھِ اننت ناگ پولیس تھانہ تہٕ اچابل پولیس سٹیشنَس منٛز این ڈی پی ایس ایکٹَس تحت واریاہ کیس درٕج کٔرمٕتۍ۔