جموں و کشمیر: رام بنس منٛز گاڑِ ہٕنٛدِس ٹکراوَس منٛز 35 یاتری زخمی۔

رام بن ضلعہٕ کِس چندر کوٹ علاقَس منٛز ژور بسہٕ ٹکراونہٕ کِس واقعَس منٛز گٔیہِ بَٹہٕ وارِ دۄہ صُبحٲے کم از کم 35 زائرین معموٗلی زخمی۔ ذٔرایعو دِژ اطلاع زِ بَٹہٕ وارِ دۄہ صبحٲے 8 بجہِ گٔیہِ شری امرناتھ یاترا خٲطرٕ پہلگام گژھَن وٲلِس قافلس منٛز أکِس گاڑِ بریک ناکام، ییٚمہِ سۭتی ژور گاڑِ ٹکراونہٕ آیہِ، ییٚمہِ کِس نٔتیٖجس منٛز کم از کم 35 زائرین زخمی گٔے۔ رامبن کِس ڈِسٹرکٹ مجسٹریٹَن دِیُت پنٛنِس ‘ایکس’ ہینڈلَس پٮ۪ٹھ أکِس پوسٹہٕ ذٔریعہٕ اِطلاع، یَتھ منٛز ووٚنمُت چُھن زِ: ‘شری امرناتھ جی یاترا کِس پہلگام قافلہٕ چہِ ٲخٕری گاڑِ گٔیہِ بریک ناکام، ییٚمہِ کِس نٔتیٖجس منٛز چندر کوٹ لنگر جایہِ پٮ۪ٹھ پھٔسِتھ گاڑٮ۪ن درمیان ٹکراو سپُد۔