جموں و کشمیر: روٗد پٮ۪نہٕ کِنۍ پوٗنچھ تہٕ راجوری ضِلعن منٛز سکوٗل بنٛد۔

خراب موسمی حالاتٕکہِ پیش نظر دِیُت حُکامو بوموارِ دۄہ جموں و کشمیر کٮ۪ن راجوری تہٕ پونچھ ضِلعن منٛز تمام سرکٲرۍ تہٕ پرائیویٹ سکوٗل بنٛد کرنُک حُکُم۔ اہلکارَو وون زِ سٮ۪ٹھا روٗد تہٕ خراب موسم کہِ وجہ سۭتۍ روزن راجوری ضلعٕک تمام سرکٲرۍ تہٕ پرائیویٹ سکوٗل بوموارِ دۄہ بنٛد۔ پونچھ کہِ ڈِسٹرکٹ مجسٹریٹ سٕنٛدِ طرفہٕ جٲری أکِس بیانَس منٛز چھُ ونٛنہٕ آمُت زِ احتیٲطی اقدام پٲٹھۍ روزن ضلعٕک تمام سرکٲرۍ تہٕ پرائیویٹ سکوٗل از 12 اگست 2025 موٗجوٗدٕ موسمی حالاتہِ کِنہِ بنٛد۔ قٲبلِ ذِکِر چھُ زِ محکمہٕ موسمیاتَن چھُ جموں و کشمیرس منٛز روٗد پیٚنٕچ پیشن گوئی کٔرمٕژ۔