میرواعظَن کٔر انسٲنی بنیادن پٮ۪ٹھ قٲدٮ۪ن یَلہٕ ترٛاونٕچ منٛگ۔ ؤزیٖر اعظم تہٕ وزیرِ داخلہس قٲدٮ۪ن ہِنٛزِ رِہٲیی تہٕ تِہٕنٛز تکلیفٕ ختم کرنٕچ اپیل۔

سرینگرَس منٛز تٲریخی جامع مسجدِ منٛز جُمعہ نماز دوران خٕطاب کٔرِتھ ڈاکٹر مولوی محمد عمر فاروقَن وون زِ 10 اکتوبر چھُ سُہ دۄہ ییٚلہِ قومُک شہید مولوی محمد فاروق 1965 منٛز گِرِفتار کرنہٕ آو، یَتھ دوران تٔمۍ پننہِ زِنٛدگی ہٕنٛدۍ ترےٚ قۭمتی ؤری جیل کٮ۪ن سخت ترین حالاتن منٛز گُزٲرۍ۔ یٔمۍ تٔمۍ سٕنٛز باقی زندگی صحت متٲثر کٔر۔

میرواعظَن ووٚن افسوس سان زِ یہِ عمل چھُ از تہِ جٲری، تِکیازِ زندگی ہٕنٛدِ پرٮ۪تھ شعبَس سۭتۍ تعلق تھاون وٲلۍ ہتہٕ بٔدۍ کٲشِرۍ نوجوان تہٕ بُزرگ چھِ ؤری وادَن تام قٲد کرنہٕ آمٕتۍ، یِمَو منٛز واریاہ چھِ صِرِف مُختٔلِف راے تھاونہٕ باپتھ سخت قونوٗنَن تحت سلاخَن پتھ کُن۔ تٔمۍ ووٚن زِ تِہُنٛد جسمٲنی تہٕ ذحنی صحت چھُ شٔدیٖد مُتٲثِر گوٚمُت، تہٕ یِہنٛدِس عیالَس چھِ سٮ۪ٹھاہ مُشکِلاتن ہُنٛد سامنہٕ کران۔

تٔمۍ ووٚن زِ قٲد کرنہٕ یِنہٕ والٮ۪ن منٛز چھِ سیٲسی رہنُما شٲمِل، یِمَن منٛز شبیر شاہ، یاسین ملک، آسیہ اندرابی، آفتاب شاہ تہٕ باقٕے تہِ شٲمِل چھِ۔