قمروٲرِس منٛز نوجوانَن پٮ۪ٹھ تبرِ حملہٕ، پولیسَن کٔر ترٛےٚ شکاوَر گِرِفتار

سرینگر پولیسَن چھِ قمرواری علاقَس منٛز أکِس نوجوانَس پٮ۪ٹھ کلہٕ سۭتۍ حملہٕ کَرنَس پٮ۪ٹھ ترٛےٚ شکاوَر افراد گِرِفتار کٔرۍمٕتۍ۔ پُلسہٕ مُطٲبِق کوٚر 14 اکتوبر نامعلوم افرادَو قمرواری، ہلال آبادَس منٛز ہارون بیکری نزدیٖک نوجوان نعمان یعقوبَس پٮ۪ٹھ کلہٕ سۭتۍ حملہٕ۔ واقعہٕ پتہٕ دستی کوٚر مظلوُم سٕنٛدِ مٲلۍ محمد یعقوبَن قمرواری پولیس چوکہِ پٮ۪ٹھ رپورٹ درٕج۔ پولیسَن وون زِ شِکایَت موصوُل گژھنہٕ پتہٕ آو پامپورہ پُلسہٕ تھانس منٛز مُختٔلِف دفعاتن تحت مقدمہٕ درٕج کرنہٕ، تہٕ تفتیش آیہِ شُروٗع کرنہٕ۔ تٔحقیٖقاتَس دوران کٔرِکھ ترٛےٚ شکاوَر افراد یِمَن ہٕنٛز شناخت ساحل یعقوب گروسٹو، فاروق عرف فرحان احمد، تہٕ بوٹ مین کالونی بوماہٕکۍ روزَن وٲلۍ بلال احمد ناوٕ سۭتۍ گِرِفتار کرنہٕ۔ پولیسَن وون زِ تمام شکاوَر افراد ٲسِکھ رٲژ چھاپَن دوران رٔٹمٕتۍ تہٕ استعمال کرنہٕ آمُت ہتھیار تہِ آو برآمد کرنہٕ۔ اِبتِدٲیی تحقیقاتَو سۭتۍ چھُ پتہ لگان زِ یہِ حملہٕ اوس ذٲتی دُشمنی ہُنٛد نتیجہٕ۔ تاہم، باقی ممکنہٕ پہلوؤن ہنٛد تعین کرنہٕ خٲطرٕ چھِ مزید تفتیش جٲری۔