کرناہَس منٛز رٲتۍ کیُت نارُک خوفناک واقعہٕ،غریب روزن وٲلۍ سُنٛد مکان پوٗرٕ پٲٹھۍ زدس منٛز سامانہٕ سوٗرۍ۔

کپوارِ کِس کرناہ علاقَس منٛز نار لگنہٕ کِس أکِس واقعَس منٛز گوٚو نار سۭتۍ اکھ رہٲیشی مکان پوٗرٕ پٲٹھۍ تباہ ۔ خبرو مُطٲبِق لوٚگ بۄدھوارِ دۄہ ژیرِ ٹاکیہ بہادر کوٹ، کرناہَس منٛز أکِس رہٲیشی مکانَس منٛز شدید نار۔ نامہٕ نگارَن ووٚن زِ حیدر علی شاہ ناوٕک أکِس غریب شہری سٕنٛدِس گَرَس منٛز لوٚگ نار، ییٚمہِ جلدٕے تباہ کُن موڑ اختیار کوٚر۔ تٔمۍ ووٚن ووٚن زِ مقٲمی بسکیٖن در وٲتۍ فوری طور واقعہٕ جایہِ تہٕ دِتُکھ فائر اینڈ ایمرجنسی سروسز محکَمَس اطلاع، یِم وٲتۍ تہٕ نار بجھاونٕچ کاروٲیی شُروٗع کٔر۔ وننہٕ آو زِ ییٖتِس کالس نار قوبوٗ آو کرنہٕ، توٚتام اوس مکانہٕ پوٗرٕ پٲٹھہِ دوٚدمُت تہٕ گَریلو سورُے سامان اوس سوٗرۍ گوٚمُت۔ اِبتِدٲیی رپورٹو مُطٲبِق چُھ نار بجلی شارٹ سرکٹ کہِ وجہ سۭتۍ لوٚگمُت۔ تاہم، سرکٲرۍ تحقیقات چھِ صٔحیح وجہُک تعین کرنہٕ خٲطرٕ شروع گٔمٕتۍ۔ مُقٲمی بسکیٖنَو چھُ ضِلعہٕ اِنتِظامیہَس پٮ۪ٹھ زور دِیُت زِ تِم کٔرِن مُتٲثِر خاندانَس فوری مٲلی مدد تہٕ بَحالی فراہم۔