عمر عبداللہ ہن چھےٚ ؤزیٖر اعظم مودی یس اپیل کٔرمٕژ زِ سُہ کٔرِن جموں و کشمیرُک ریاستہٕ بحال کرنُک وعدٕ پوٗرٕ

جموں و کشمیرٕکۍ وزیر اعلیٰ عمر عبداللہ ہَن کٔر برٛسوارِ دۄہ ؤزیٖر اعظم نریندر مودی یس اپیل زِ سُہ کٔرِن جموں و کشمیر کین لوٗکَن سۭتۍ ریاستُک درجہٕ بحال کرنُک وعدٕ پورٕ۔ تٔمۍ ووٚن زِ نیشنل کانفرنسٕچہِ قیادژ منٛز چھِ حکوٗمت عوٲمی خواہشَن مُطٲبِق ترقی، خوشحالی تہٕ جمہوری بحٲلی ہٕنٛدِ عزمَس سۭتۍ کٲم کران۔
جوٚمَس منٛز أکِس پریس کانفرنسَس خٕطاب کٔرِتھ ووٚن عمر عبداللہ ہَن زِ أمۍ سٕنٛزِ حکوٗمتُک اکھ ؤری چھُ مُکمل گوٚمُت، تہٕ اَتھ وقتَس دوران چھِ ریاستُک درجہ بحال کرنہٕ خٲطرٕ واریاہ کوٗشِشہِ کرنہٕ آمژٕ۔
تٔمۍ ووٚن: ‘اسہِ ٲس وۄمید کٔرمٕژ زِ مرکز کَرِ سانہِ حکوٗمت کِس گۄڈٕنِکِس ؤرۍ یَس دوران ریاستُک درجہٕ بحال، مگر بدقٕسمتی سۭتۍ گوٚو نہٕ یہِ۔ بہٕ چھُس ؤزیٖر اعظم مودی تہٕ تٔمۍ سٕنٛدِس ٹیمَس درخواست کران زِ تِم کٔرِن لوٗکَن سۭتۍ کرنہٕ آمُت وعدٕ پوٗرٕ تہٕ جموں و کشمیرُک ریاستی درجہٕ کٔرِنۍ بحال’۔
وزیر اعلیٰ ہن ووٚن زِ نیشنل کانفرنس حکوٗمتَن چھِ ریاستُک درجہٕ بحال کرنہٕ کِس حقَس منٛز اسمبلی منٛز اکھ قرارداد پیش کٔرمٕژ۔