کرگِلس منٛز اکھ پُر امن خاموش احتجٲجی مارچ۔

کرگِل ڈیموکریٹک الائنس (کے ڈی اے) ہُک شریک چیئرمین اصغر علی کربلایی یَن ووٚن جُمعہ دۄہ زِ عوٲمی خواہشَن تہٕ مُطالبَن مُتعلِق چھُ حکوٗمتُک رٔویہِ انتہٲئی نامُنٲسِب تہٕ بے حسی روٗدمُت۔ تٔمۍ ووٚن زِ لوٗکَن ہٕنٛدِ اصلی مسلہٕ چھِ لگاتار نظر انداز یِوان کرنہٕ، یَتھ خٕلاف کے ڈی اے یَن چھُ وۄنۍ اکھ منظم تہٕ پُر امن احتجاجی تحریک شروع کرنُک فٲصلہٕ کوٚرمُت۔ اَتھ سلسلَس منٛز چُھ کارگِل ڈیموکریٹک الائنسَن اعلان کوٚرمُت زِ بٹہٕ وارِ دۄہ 18 اکتوبر 2025 یِیہِ اکھ خاموش تہٕ پُر امن احتجاجی مارچ کرنہٕ۔ یہِ مارچ گژھہِ چنگرہ بازار پٮ۪ٹھٕ شُروع گَژھان، مرکٔزی بازر کِنۍ نیرِ، زنبیہ چوکَس تام واتنہٕ تہٕ ٲخٕر کار لال چوک، کرگِلس پیٹھ سپدِ۔ کربلائی مُطٲبِق یِیہِ ضِلعہٕ کِس تمام سب ڈویژنَن تہٕ بلاک ہیڈ کوارٹرَن منٛز تہِ یِتھی پٲٹھۍ خاموش مارچ کرنہٕ یُتھ پوٗرٕ علاقَس منٛز لوٗکھ پنٕنۍ ناراضگی تہٕ یکجہتی ہُنٛد اِظہار کٔرِتھ۔ تٔمۍ ووٚن بیٚیہِ زِ لیہہ واقعہٕ کِس متٲثرین سۭتۍ ہمدردی تہٕ یکجہتی ہُنٛد ظٲہِر کرنہٕ خٲطرٕ یِیہِ شامَس سٲرِسٕے لداخ کِس علاقس منٛز علامتی بلیک آؤٹ کرنہٕ۔