ریزرویشن پالیسی منٛز ترمیم منظوٗر، فائل یِیہِ ایل جیس سوزنہٕ: وزیر اعلیٰ عمر عبداللہ
جموں و کشمیرٕکۍ وزیر اعلیٰ عمر عبداللہ ہن ووٚن زِ موجودٕ حکومتن چھُ پنٕنۍ انتخابی وعدٕ نافذ کرُن شروع کوٚرمُت تہٕ درگاہ چہِ حرکتٕچ تٲریخی روایت بحال کٔرِتھ چھُکھ عوٲمی اعتماد مزید مضبوٗط کوٚرمُت۔
جُمعہ دۄہ صحافیَن سۭتۍ کَتھ باتھ کٔرِتھ ووٚن وزیر اعلیٰ زِ بہٕ چھُس گۄڈٕنِکہِ دۄہ پٮ۪ٹھ ونان زِ یوٚتام جموں و کشمیر مرکزٕچ زیر انتظام علاقہٕ چھُ، أسۍ کٔرِو پننٮ۪ن حدن منٛز عوامس سۭتۍ کرنہٕ آمٕتۍ تمام وعدٕ پوٗرٕ۔
تٔمۍ ووٚن زِ ریزرویشن پالیسی منٛز ترمیم چھِ امہِ عزمٕچ اکھ اہم مثال۔ وزیر اعلیٰ ہن ووٚن ‘کابینی ذیلی کمیٹی یٔمۍ وزیر سکینہ ایٹو سٕنٛز صدارت منٛز کٔر پنٕنۍ کٲم مُکمل تہٕ رپورٹ کٔر کابینہٕ برٛونٛہہ کَنۍ پیش۔ کابینہٕ کٔر اتھ رپورٹس منظوٗری۔’
تٔمۍ ووٚن بیٚیہِ زِ وۄنۍ چھُ کابینی میمو محکمہٕ سمٲجی بہبودٕ طرفہٕ تیار کرنہٕ یِوان، یُس منظوٗری پتہٕ لیفٹیننٹ گورنرَس سوزنہٕ یِیہِ۔
وزیر اعلیٰ عمر عبداللہ ہَن ووٚن زِ حکوٗمتَن اوس عوامس درگاہ ہٕنٛز رٮ۪وایت بحال کرنُک وعدٕ کوٚرمُت۔