نیشنل کانفرنسن سوٗزۍ پنٕنۍ واریاہ نُمایا رہنُما دِلہِ مگر کیٚنٛہہ گٔیہِ دِلہِ ہٕنٛزِ آلودگی سۭتۍ مُتٲثِر: عمر عبداللہ
جموں و کشمیرٕکۍ وزیر اعلیٰ تہٕ نیشنل کانفرنسٕک نٲیِب صدٕر عمر عبداللہ ہَن ووٚن برٛٮ۪سوارِ دۄہ زِ شیخ محمد عبداللہ سٕنٛدِ پٮ۪ٹھٕ ڈاکٹر فاروق عبداللہ تہٕ وۄنۍ پانہٕ چھِ نیشنل کانفرنسَن ہمیشہٕ پنٕنۍ مضبوٗط تہٕ تجرُبہٕ کار رہنُما جموں و کشمیرٕچ مؤثر طریقہٕ سۭتۍ نمایندگی کرنہٕ خٲطرٕ دِلہِ سوزمٕتی ، مگر بدقسمتی سان گٔیہِ یِمو منٛز کینٛہہ دِلہِ ہٕنٛز آلودگی سۭتۍ مُتٲثِر گژھنہٕ کِنۍ عوام نِش دور۔
ہندوٲرِس منٛز أکِس عوٲمی جلسس خٕطاب کران ووٚن عمر عبداللہ ہَن زِ ‘شیخ صٲبنہِ پٮ۪ٹھٕ ڈاکٹر فاروق صٲبَس تہٕ مےٚ تام چھِ سانہِ پارٹی ہمیشہٕ پنٕنۍ سٲتھی دِلہِ سوزمٕتۍ تاکہ تِم ہیکَن یتہِ کٮ۪ن لوٗکَن ہٕنٛز آواز بٔنِتھ۔ مگر بدقٕسمتی سۭتۍ گٔے
کیٚنٛہہ لُکھ دِلہِ گژھنہٕ پتہٕ اَمہِ کہِ آلودگی سۭتۍ مُتٲثِر۔
تٔمۍ ووٚن زِ نیشنل کانفرنسٕچ تٲریخ چھےٚ گوٲہی دِوان زِ أمۍ چھِ ہمیشہٕ قٲبِل تہٕ تجرُبہٕ کار آوازٕ دِلہِ سوزمٕژٕ۔ تاہم، سارِوٕنٕے روٗد نہٕ عوامس سۭتۍ پنُن تعلق قٲیِم۔