ایس آیی اے چھُ نارکو ٹیرَر کارکُن رٔٹنہٕ باپتھ پنٕنۍ کوٗشِش جٲری تھٲوِتھ، بیٛاکھ اکھ فرار نفر گِرِفتار۔

کٔشیٖرِ منٛز ریاستی تفتیشی ایجنسی (ایس آیی اے) کٔر از سرینگر کِس بمنہ علاقہٕ پٮ۪ٹھٕ اکھ اہم آپریٹر گِرِفتار کٔرِتھ نارکو ٹیرر کیسَس منٛز اکھ اہم کامیٲبی حٲصِل۔ مُلزِم بشارت علی ولد محمد صادق کرناہ کپوارہاوس پٔتِمٮ۪و ترٛٮ۪و ؤریَو پٮ۪ٹھہٕ ایس آیی اے کشمیر کِس ایف آئی آر نمبر 19/2022 منٛز گِرِفتٲری نِش بچان۔ سُہ آو از أکِس خصوٗصی ایس آیی اے ٹیٖمہٕ چہِ وسیع کوٗشِشہِ پتہٕ رٹنہٕ۔

اَتھ معاملَس منٛز چھُ لشکر طیبہ ہَس سۭتۍ وابستہٕ پٲکِستان حمایت یافتہٕ نارکو ٹیرَر نیٹ ورک شٲمِل، یُس کرناہ سیکٹرَس منٛز سرحدَس اپارِ منشیات تہٕ ہتھیار سمگلنگ کران اوس۔ منشیات کٕننہٕ سۭتۍ حٲصِل گژھن وول نفع اوس جموں و کشمیرَس منٛز ملی ٹنسی خٲطرٕ مٲلی اعانت فراہم کرنہٕ باپتھ استعمال کرنہٕ یِوان۔

قٲبلِ ذِکِر کتھ چھےٚ یہِ زِ بشارت چھُ اَتھ معاملَس منٛز ژوٗرِم مفرور نفر قرار دِنہٕ آمُت، تہٕ ایس آیی اے یَس چھِ وۄمید زِ أمۍ سٕنٛزِ گرفتٲری کِس نٔتیٖجَس منٛز یِنۍ مزید رٲبطہٕ ظٲہِر کرنہٕ۔