وادی ہٕنٛدٮ۪ن ہیٚرمٮ۪ن علاقن تہٕ سیاحتی جاین پٮ۪ٹھ شیٖن ،مٲدٲنی علاقَن منٛز روٗد۔

محکمہٕ موسمیات طرفہٕ پیشن گویی مُطٲبِق گوٚو بۄموارِ دۄہ شامَس وادی کٔشیٖرِ ہُنٛد موسم تبدیل، ہیٚرمٮ۪ن علاقن منٛز پیوٚو شیٖن ییٚلہِ زن مٲدٲنی علاقن منٛز وقفہٕ وقفہٕ روٗد پیوٚو، ییٚمہِ کِس نٔتیٖجس منٛز درجہٕ حرارتس منٛز واریاہ کٔمی آیہِ۔ موسمَس منٛز اچانک تبدیٖلی سۭتۍ چھُ وادی منٛز سردی تیز گٔمٕژ، ییٚمہِ سۭتۍ لُکو گرم پَلو لاگٕنۍ شروع کٔرمٕتۍ چھِ۔ أکِس نامہٕ نگارَس مُطٲبِق گوٚو بۄموارِ دۄہ ژیرِ شامَس مشہوٗر سیاحتی جاین سونہٕ مارگ، گُلمرگ، دودھ پتھری تہٕ یُوسمرگ کٮ۪ن پہٲڑی علاقن منٛز شیٖن پیوٚن شُروٗع، ییٚمۍ خوٗبصوٗرت وادی سفید کملہِ منٛز ؤج۔ شیٖن وچھنہٕ خٲطرٕ موجود سالانٮ۪و کوٚر خوشی ہُنٛد اِظہار۔ سالانٮ۪و ووٚن زِ شیٖن پیٚنہٕ سۭتۍ آیہِ کٔشیٖرِ ہِنٛدِس ماحولَس اکھ نٔو تازٕگی۔