کانٛگریس کَرِ نہٕ توٚتام کابینہس منٛز شرکت یوٚتام نہٕ رِیاستُک درجہٕ بحال یِیہِ کرنہٕ: طارق حمید قرہ

جموں و کشمیر پردیش کانگریس کمیٹی ہٕنٛدۍ صدر طارق حمید قراہن ووٚن زِ وزیر اعظم نریندر مودی تہٕ وزیرِ داخلہ امیت شاہَن یِم جموں و کشمیر کٮ۪ن لوٗکَن سۭتۍ وعدٕ کٔرۍ تِم چھِنہٕ وُنیُک تام پوٗرٕ گٔمٕتۍ۔ تٔمۍ ووٚن صاف زِ یوٚتام نہٕ جموں و کشمیرس مُکمل ریاستُک درجہٕ بحال گژِھہ کانگریس پارٹی گژھِ نہٕ کُنہِ تہِ صوٗرتس منٛز کابینہس منٛز شٲمِل۔

مسٹر طارق قرہَن دِیُت یہِ بیان از بوموارِ دۄہ سرینگرَس منٛز صحافیَن سۭتۍ کتھ باتھ کرنس دوران۔ تٔمۍ ووٚن زِ 5 اگست 2019 کٮ۪و فٲصلو پتہٕ ٲسۍ مرکٔزی حکوٗمتَن جموں و کشمیر کٮ۪ن لوٗکَن سۭتۍ واریاہ وعدٕ کٔرمٕتۍ، مگر شیٚیہِ ؤری پتہٕ تہِ آو نہٕ یِمَو منٛز کانٛہہ تہِ وعدٕ پوٗرٕ کرنہٕ۔

تٔمۍ ووٚن زِ ؤزیٖر اعظم تہٕ وزیرِ داخلہٕ اوس ریاستُک درجہٕ بحال کرنُک، روزگارٕک موقعہٕ تہٕ عوٲمی نمایندگی مضبوٗط کرنُک وعدٕ کوٚرمُت، مگر حقیقت چھےٚ یہِ زِ از تہِ چھِ جموں و کشمیرٕکۍ لوٗکھ سیٲسی غٲر یقینی صورتحالس منٛز پھسیمٕتۍ۔