مُتحد مجلس علماہو کوٚر سکولن منٛز ‘وندے ماترم’ لٲزمی بناونَس پٮ۪ٹھ سٮ۪ٹھاہ تشویشُک اِظہار۔

جموں و کشمیرَس منٛز مذہبی تہٕ روحٲنی تنظیمَن ہٕنٛدِ مُشترکہٕ پلیٹ فارم، مجلس علماہو کوٚر محکمہٕ ثقافت کہِ طرفہٕ جٲری کَرنہٕ آمتِس حالٕے حُکمَس پیٹھ سٮ۪ٹھاہ تشویش تہٕ افسوسُک اِظہار، یَتھ منٛز پوٗرٕ رِیاستَس منٛز سکولَن ‘وندے ماترمٕکۍ’ 150 ؤری پوٗرٕ گژھنٕچ یاد مناونہٕ خٲطرٕ ثقافتی تہٕ موسیقی ہٕنٛدِ پروگرام منعقد کرنٕچ ہدایت دِنہٕ آمٕژ چھےٚ۔
میر واعظ سٕنٛدِس سربرٲہی منٛز چُھ مُتحدہ مجلس علماہو یہ حکم نہ صرف مذہبی آزٲدی خلاف بلکہِ وادی منٛز فرقہ وارانہٕ ہم آہنگی تہ خطرٕ قرار دیُتمُت ۔
مجلس مطٲبق چھُنہٕ وندے ماترمُک گٮ۪وُن یا تلاوت اسلٲمی عقائدس سۭتۍ مطابقت تھاوان تکیازِ اتھ منٛز چُھ عبادتُک اظہار تہٕ تعظیم توحید کِس نظریس مُتصادم، یعنی اللہ تعالیٰ سٕنٛز وحدانیت سۭتۍ۔